2015年6月7日 星期日

唔駛用焗爐整嘅豬仔骨 (免焗、免醃)

我們一家都好鍾意食豬仔骨㗎,平時出街食好多時都會叫嚟食,但大部分餐廳都又貴又唔好食(又乾又韌),真係超級失望!>.<
我又好懶開焗爐喎(因為好怕洗焗爐^_^),所以一直都冇試過在家烤豬仔骨,但前幾天忽發奇想,其實用炆嘅方法煮應該都ok吖,試整了第三次終於都似模似樣喇,重好淋好入味𠻹!Yeah! 以後都唔駛去餐廳先有得食豬仔骨了!✌️✌️✌️
你哋話似唔似用焗烤做嘅烤豬仔骨呢?方法材料都超級簡單,你哋都快啲試下整啦!^_^



材料:
豬仔骨 500g (急凍丹麥豬仔骨一包)
薑 2 片

調味:
熱滾水 500ml
燒烤醬 150g 
砂糖 2湯匙
生抽 2湯匙
鹽 1/3茶匙

備註:另可隨意加入個人喜愛的香料作調味(例如黑胡椒碎)

做法:
1)豬仔骨解凍後,用清水輕輕沖洗乾淨,抹乾後在中間切開分成兩份備用。
2)用大火將鑊燒熱後,加入2湯匙油先把薑片爆香,轉中細火把豬仔骨的兩邊慢慢煎香。
(此步驟十分重要!因為上碟時,豬仔骨似唔似用焗爐烤一般的吸引,就視乎這時煎得靚唔靚、夠唔香!最好連豬仔骨的邊邊都煎埋,賣相更佳!)
3)當豬仔骨的兩邊都煎香後,先落燒烤醬炒一炒,然後加入熱滾水和其他調味,煮滾後加蓋可每用細火炆1小時,熄火再焗半小時。
(如選擇炆1.5小時以上,則可立刻享用而不須再焗了)。
4)炆好後,先把豬仔骨盛起。
5)用中火把醬汁煮至杰身後(其間用鑊鏟打圈攪拌,可加快水分蒸發,令醬汁快些杰身),把豬仔骨回鑊以掛上醬汁後,即可盛起享用了。 
(如想再靚仔啲,可用火槍燒一燒豬仔骨表面,咁就九成九似烤豬仔骨了!)







2015年5月25日 星期一

太平淸醮2015

家人一早送給我大大個嘅平安包,未食都已經覺得(心裡)好甜好滿足了!祝福大家都平平安安、健健康康啦!😊


2015年4月27日 星期一

露筍煙肉帶子卷

這是一道色香味俱全而且十分簡單易做的宴客菜式之一,廚房新手亦輕易做到餐廳水準,大家都快啲試下啦!


材料: (份量做到16件)
急凍帶子 6-8粒(視乎大小:大粒- 1開3,細粒- 1開2,共需約16片)
薄片煙肉 16片
BB 露筍 半扎
蒜蓉 少許

做法:

  1. 帶子解凍後,以廚房紙印乾水分,除去較硬身的蒂部後,用刀橫切成約0.5厘米厚的薄片帶子備用。
  2. 露筍洗浄後,切成兩段瀝乾水分備用。
  3. 將鑊燒熱後轉中火,加少許油爆香蒜蓉,加入露筍快炒,灑少許鹽調味,拌勻後盛起放涼備用。
  4. 拿一塊薄煙肉平放於砧板上,在一邊先放一片帶子,再放數條露筍(份量隨意)於帶子之上,然後慢慢把煙肉卷起,收囗向下放好。用以上方法把所有帶子用煙肉卷好備用。
  5. 將鑊燒熱轉中火,加少許油,放入所有煙肉帶子卷(收囗向下),將兩邊煎香後即可盛起享用。

備註:

  1. 若不喜歡吃露筍,可以只用煙肉卷起帶子來煎香,雖然顏色相對冇咁靚,但是同樣美味,而且製作更簡單快捷,連包連煎,不用15分鐘就食得,認真快、靚、正呢!
  2. 煎帶子卷時,先將煙肉收口的一面落鑊煎香,有助定型和不會散開。
  3. 由於煙肉本身已有咸味,因此帶子不用調味,用煙肉卷着吃,味道剛好。

If you like my recipe, please "Like" my page in Facebook, Thanks! ^_^


2015年4月24日 星期五

自製肥牛珍珠米漢堡(Rice Burger)

今次為大家介紹的肥牛珍珠米漢堡,不但美味可口、賣相吸引、製作簡單、而且營養豐富,大人同小朋友都一定鍾意㗎!


材料:(份量做到兩個漢堡)
珍珠米 200g ( 加~240ml 水煮成飯)
肥牛 120g
大蘑菇 80g (portobello mushroom)
紫洋葱 80g
橙色燈籠椒 40g
紅色燈籠椒 40g
薑 數片

肥牛調味: 生抽 3/4湯匙 / 砂糖1茶匙 / 麻油和胡椒粉 各少許 / 清水 1湯 匙

做法:
  1. 將珍珠米洗淨後加水煮成飯,用筷子扒鬆,將飯分成四份(用磅量度:每份~100g),然後用保鮮紙包成一個圓球狀,用掌心輕輕握實後按扁,再用一隻碟或煲蓋將飯團壓成一個圓餅狀備用(保鮮紙在煎之前才脫去)。
  2. 肥牛加入調味醃最少15分鐘備用。
  3. 蔬菜洗淨後,將大蘑菇切片、彩椒先橫切再一開二及洋蔥橫切成一圈圈備用。
  4. 當鑊燒熱後轉中火,加少許油先把洋蔥略炒一會,然後在鑊的另一邊加少許油將大蘑菇兩邊煎香,最後落彩椒同炒至略為軟身後,加少許鹽調味,拌勻後盛起備用。
  5. 將鑊再燒熱後,落少許油爆香薑片,以大火快手爆香肥牛,盛起備用。
  6. 將蔬菜再次回鑊,以中火略炒一會以吸收牛肉汁的味道後,熄火盛起備用。
  7. 將鑊燒熱後,落少許油以中火把飯餅的兩邊慢慢煎香至表面形成一層硬薄膜後,盛起備用。
  8. 將兩片已煎香的飯餅夾入適量的肥牛和蔬菜餡料後,即成美味的肥牛珍珠米漢堡了。
備註:
  1. 其實米漢堡的餡料可隨意選配其他材料,份量也是隨意的,但建議把所有材料都切成較長身或是一圈圈的,這樣餡料便不易跌出米漢堡。
  2. 由於每隻珍珠米的受水程度不同,以上米和水作的比例只作參考,請自行調較米水以煮出偏硬的米飯為佳。
  3. 用珍珠米做的飯比普通米較黏,因此較易成型而不易散;此外,珍珠米亦比較煙韌,和肥牛一起吃囗感較佳。
  4. 建議用牛油紙像包漢堡包般將米漢堡包著來吃(尤其是給小朋友吃時),以避免吃時餡料跌出來或是米漢堡散開。

If you like my recipe, please "Like" my page in Facebook, Thanks! ^_^

2015年4月13日 星期一

無水蒸薑蔥大花蟹@LC 22cm Buffet

今日行過街市,本來想買蝦食但係唔太靚,所以我就轉軚,同相熟的魚檔老板賣了這隻好似我個女塊面咁大嘅花蟹回來喇!因為它是獨臂既關係,$200重有錢找(如果有齊兩隻鉗,就起碼要$600以上,太貴我就唔捨得買了!),咁新鮮只須清蒸便已好鮮甜了,但我鍾意加埋薑蔥煮,連洗連煮只須20分鐘就食得了,你哋都試下啦!


製作難度:💋(最高難度為6個💋)
製作時間:約20分鐘

材料:(2人份量)
大花蟹 一隻
薑 數片
蔥段 少許

調味:鹽及胡椒粉 各少許

做法:
1)將已清洗乾淨及劏好的蟹瀝乾備用。
2)放約半碗水於鍋中,加蓋用大火將水煮滾(看到鍋邊冒煙便可),熄火後倒去鍋中的水備用。
3)開中火,落1湯匙油把薑片和蔥段輕輕炒香,熄火後快手將蟹肉和蟹蓋排好,加入3湯匙熱水及少許鹽和胡椒粉調味。
4)加蓋後用中火煮4分鐘,然後轉細火煮4分鐘後熄火再焗8分鐘即成。

備註:
如家𥚃沒有LC buffet鑄鐵鍋,也可用傳統方式隔水以大火蒸10-15分鐘即可。

2015年3月17日 星期二

是日靚湯:薯仔蕃茄豆腐煲牛鰍魚湯

工作繁忙,好耐冇煲魚湯了,今天經過街市見到有靚牛鰍魚,立刻買嚟煲啖靚湯飲先!
其實,每當我見到煲到奶白色的魚湯都會好興奮,未飲都覺得好甜了,飲落更是甜到暈!正呀!你哋都快啲煲嚟飲啦!😊


2014年9月16日 星期二

豉汁南瓜排骨飯

八號風球讓我可以多睡幾小時,還夠時間煮個一人豉汁排骨煲仔做午餐,食飽飽要返工囉!😋