自製臘肉話咁易

去年我心血來潮突然想自己整臘肉，我就去我買開醬油的舖頭請教那位看舖的伯伯怎麼製作臘肉（我當然有幫襯啦！），他又不厭其煩教我喎，真係好人呢！於是我就回家試整了第一次，結果都幾好味但太甜。因此我又調較了醃料份量再整了第二次，今次味道剛剛好，正呀！我重用來整蘿蔔糕和芋頭糕送俾親朋戚友添，他們都讚不絕囗，好有滿足感呢！今年當然要再整啦！^0^

我是用新鮮五花腩來做的（肥瘦適中，不像市面賣的肥膏多過肉），除了肉味濃啲好味啲又唔太肥之外，最重要是無落防腐劑健康啲，自己整又衛生啲添！好易整架咋，你哋都快啲趁有北風動手整啲來送禮或用來新年整糕啦！

這是今年做的臘肉，重吊喺我個窗口嗰度，就食得喇！^0^

這是去年做的臘肉

材料：

五花腩 約3斤

砂糖 110g

生抽 100g

老抽 160g

玫瑰露 140g

做法：

1. 先將五花腩洗淨，拔去剩餘的豬毛，用棉繩穿起豬皮備用。


2. 燒熱一鑊滾水，然後拿著棉繩把五花腩浸於滾水中約2秒後拿起，吊於通風處風乾5-6小時備用。


3. 將所有醃料預先拌勻（砂糖唔溶亦不要緊），然後全部倒進已放了五花腩的大盤中拌勻，用保鮮紙蓋好放進雪櫃醃三日（其間每天要拿出來翻動2-3次，以確保五花腩能均勻醃製）。


4. 將醃好的五花腩吊於通風乾爽處（有陽光直接照射更佳），臘製一星期左右，直至見到五花腩出油有光澤及有香味即成。

備註：

1. 買豬肉時，不妨告訴他你是用來醃臘肉的，請他幫忙把五花腩切成約1.5cm厚(太厚難入味，若厚度多過1.5cm就要多醃一至兩天，但臘好後可能會較硬），再在豬皮處輕輕剁一刀成小孔，方便用來穿棉繩吊起臘肉的（要穿豬皮啊，因為豬皮不易斷！）。


2. 若不怕麻煩，其實可於醃製1天後，翌日於日間有陽光時吊起風乾，到晚上再放入醃料中醃製，將此步驟重覆做4-6日（視乎臘肉的厚度而定），然後再吊乾至出油及有香味為止。這樣做臘肉會較入味和易上色，但我怕麻煩所以無咁做！＞.＜


3. 若只做少量（約一斤），可以用較大的密實袋來放醃料醃肉，只要排出多餘的空氣，醃料便會均勻地包著腩肉了。只須每天早晚拿出來隔着袋（不用打開袋）輕輕搓搓，然後反轉放回雪櫃繼續醃（共3天）便可。


4. 若有太陽曬，臘肉會出較多油及較香。若好像我家那樣沒有陽光照入屋，亦可在臘製第三天開始，每天將臘肉吊在暖爐前 3-4小時（約有32-36度），亦可令臘肉出油做到差不多效果。我去年是這樣做效果不錯啊，但今年暖爐壞了無得用，只是風乾都很香呢！


5. 做好的臘肉可以用膠袋包好存放雪櫃，可保存3個月。


6. 老抽主要是用來調較顏色。我用了160g老抽醃製，顏色會像外面賣的一樣深色；若不喜歡太深色，可用140g老抽來醃製。


7. 醃料不要立刻倒去，因為若臘肉風乾一天後覺得不夠深色，可以加20g老抽於醃料中拌勻，放入臘肉再醃一晚翌日再吊起風乾。

If you like my receipe, please "Like" my Facebook page!! Thanks for your support!! ^_^

清潤雪梨竹蔗水

yummy!

材料：
清水 4.5L
竹蔗 3支﹝每支可以切成3段）
雪梨 5個
紅蘿蔔 1-2個
馬蒂 1斤
粟米 1支 (可以唔落）
薏米 50g

做法：

聖誕棒棒曲奇

今年整了人仔棒棒曲奇給Chloe帶回校送給同學仔做聖誕禮物！本來聖誕應該整薑餅人的，但我估小朋友應該唔多喜歡食薑餅，於是我就整了小朋友至愛的朱古力曲奇喇，我重加咗好多杏仁碎來整添，好香好好味架！Yummy! ^0^

這是我第一次用icing裝飾曲奇餅，以前一直有都啲抗拒用icing，因為怕會好甜又唔健康。但原來又唔係我想像中咁甜喎，可能我唔係唧咗好多，重覺得好味啲添！^0^

我一共整咗65份，因為好夜先開始整，Chloe又要「幫手」吸摸喎，足足整咗我成晚，早上六點先有得瞓，瞓兩個鐘重要起身返工添！>.<雖然整完超級疲倦，不過真係好好玩呢，一於有時間再整過！嘻嘻！

 材料﹕（約可做到35塊）

無鹽牛油 70g

黑糖 80g

蛋 1隻（~45g）

低筋麵粉 200g

無糖可可粉 12g

杏仁粉 20g

鹽 少許

做法：

1. 牛油室溫放軟備用。
2. 先將低筋麵粉、朱古力粉和少許鹽混合過篩備用。
3. 用電動打蛋器將牛油和黑糖打發至完全混合及鬆軟，然後分兩次加入已打發的蛋攪勻。
4. 將已過篩的麵粉分次加入及攪勻，最後加入杏仁粉拌勻即成。
5. 將麵團用保鮮紙包好放入雪櫃冷藏20分鐘後至較為硬身才拿出來做型。
6. 預熱焗爐於190度。
7. 拿出1／5份麵團放在牛油紙上，蓋一張保鮮紙，用麵粉棒隔著保鮮紙把麵團擀平至約3mm厚度，然後掀開保鮮紙，用曲奇模吸出人形麵團（約可吸出7-8個），再逐一放在可入爐紙棒上輕輕壓實。
8. 將已做型的麵團放入焗爐以190度焗10-15分鐘後，取出放在架上放涼後備用。
9. 加入3茶匙暖水於150g裝飾預拌糖霜中，用電動打蛋器攪勻至有光澤（約需時2-3分鐘），再分開數份分別拌入少許食用色素（用牙籤點少許便可；我用Wilton，比較杰身），再裝入小膠袋中封口，在另一端剪開少少便可用來裝飾曲奇了。
10. 裝飾好的曲奇平放在架上，待糖飾乾透，便可包裝好用來送禮了。

備註：

如要看更多製作過程的相片，請到：
http://www.facebook.com/media/albums/?id=160110140725573#!/media/set/?set=a.241012532635333.56258.160110140725573&type=1

If you like my recipe, please "Like" my page in Facebook! Thanks! ^_^

蒜片牛柳粒炒紅飯

這是我至愛的晚餐之一，但現在於餐廳越來越難吃到美味的牛柳粒紅飯了，啲牛柳粒成曰整到又乾又韌！又貴又唔好食真係好失望呢！ 所以我昨晚終於決定自己煮來食！雖然這是我第一次整，冇跟任何食譜，亦可能不像外面吃的正宗，但結果............正過出面食好多呢！（因為啱自己口味嘛）（唔好意思，好似好hard sell咁，但是事實啊！） 我用安格拉斯牛肋條切粒來整（喺普通凍肉舖買，$60兩塊），煮得剛剛好，啲牛柳粒又「淋」又juicy!! Yummy!! 阿女同老公好快食晒，連老公都話好味過面食啊！好開心呢！ 其實一啲都唔難整，你哋都試下整啦！

材料：
米 170g
牛柳 190g
蒜頭 16g
蛋 1隻

牛柳調味：豉油１湯匙 ／ 砂糖1/2湯匙 ／ 清水 １湯匙 ／ 黑椒碎及麻油 適量

炒飯調味：茄汁 ２湯匙 ／ 砂糖 ｌ茶匙 ／ 鹽 少許

做法﹕

1. 將米洗淨後煲成白飯，用筷子抓鬆後，盛起放涼備用。
2. 牛柳切粒加調味醃15-30分鐘後備用。
3. 蒜頭去衣切成薄片，用2湯匙油以慢火炸至金黃色後，盛起備用。
4. 將1茶匙砂糖和茄汁拌勻後備用。
5. 將鑊燒熱後，落少許油（用來炸蒜片的油），先落已打發好的蛋，再落飯快炒，灑少許鹽，然後落茄汁炒勻後即可熄火。
6. 用飯碗盛起炒飯後輕輕壓實，蓋上碟，快手倒轉後備用（暫不要掀開碗）。
7. 燒熱另一隻鑊，落少許油（用來炸蒜片的油），落牛柳粒（隔去多餘的醃肉調味料）用大火快炒至約七成熟後，盛起備用。
8. 轉細火後，倒入剩餘醃肉的調味料，加入一半炸蒜片，加少許粟粉水煮至微杰後，倒進牛柳粒快手炒勻即可。
9. 先掀起飯碗，在飯旁放牛柳粒，灑少許炸蒜片及適量黑胡椒碎後即成。

如要看更多製作過程的相片，請到：
http://www.facebook.com/media/set/?set=a.238775766192343.55811.160110140725573&type=1

If you like my recipe, please "Like" my page in Facebook! Thanks! ^_^

冬日熱飲–雪梨薑蜜

今日放工買了一份雪梨打算用來煲湯的，但最後偷懶冇煲到！>.<
洗完碗後見有時間就煲了這個雪梨薑蜜，宜家就可以一邊嘆住杯又潤又可驅寒的薑蜜，一邊寫食譜喇！嘻嘻！！^_^

材料：

清水 1700ml

雪梨 5個

薑 30g

蜜糖 適量

做法：

1. 雪梨去皮去核後切件備用。
2. 薑去皮切片備用。
3. 用小鍋把清水煮滾後，放進雪梨和薑，以中火煲30-45分後，熄火再焗15分鐘即可。
4. 喝前才加入適量的蜜糖調味即成。

備註﹕

1. 

如要看更多製作過程的相片，請到：

http://www.facebook.com/media/albums/?id=160110140725573#!/media/set/?set=a.238275196242400.55736.160110140725573&type=1

If you like my recipe, please "Like" my page in Facebook! Thanks! ^_^

自家製熱香餅

我由細到大都好鍾意食pancake架，今朝阿女好早就叫醒咗我，而我又心血來潮好想食pancake喎，就即刻走入廚房左溝右溝煮了這個自家製熱香餅喇！係咪煎得好靚呢？好易整架咋，你都快啲試下整啦！用來做早餐或下午茶小食都一樣咁正架！重包保唔會好似麥噹噹嗰啲熱香餅咁食落會「拿脷」（因為佢哋用baking soda）！^0^

材料：（約有8塊）

材料：

低筋麵粉 200g

鮮奶 一盒（237ml)

大雞蛋 2隻 （我用CP XL 雞蛋）

砂糖 50g

油 15g

泡打粉 1.5茶匙（baking powder）

鹽 少許

做法：

1. 將所有材料拌勻後，靜置半小時（最少15分鐘）。


2. 將鑊燒熱後，用少許油（數滴）塗勻平底鑊（只須塗一次），然後倒進少許粉漿，用慢火煎至冒出氣泡（下圖）後反轉再煎1-2分鐘即可。


3. 可隨個人喜好，選擇加牛油和糖漿／粗粒花生醬和煉奶／香蕉和朱古力漿來食，各有特式，不遇一樣咁好味！^0^

如要看更多製作過程的相片，請到：

http://www.facebook.com/home.php?#!/media/set/?set=a.237084346361485.55540.160110140725573&type=1

If you like my recipe, please "Like" my page in Facebook! Thanks! ^_^

蒜蓉粉絲蒸海中蝦

好耐冇食過了！真係好好味啊！Yummy！！

材料：
海中蝦 半斤
粉絲 40g
蔥花 少許

蒜蓉醬材料：
蒜蓉 40g
薑蓉 3g
豉油 1茶匙
砂糖 1/2茶匙
鹽 1/3茶匙
胡椒粉、麻油 各少許
油 1-2湯匙

蒜蓉醬做法：
將鑊燒熱後，落1-2湯匙油把薑蓉和一半蒜蓉用慢火爆香，用碗盛起，然後加入餘下的蒜蓉及其他調味料拌勻即成。


做法：

1. 預備蒜蓉醬。
2. 用熱水浸軟粉絲（約5-10分鐘，視乎粉絲的粗幼）後再過冷河，瀝乾備用。
3. 將海蝦洗淨後，剪去蝦頭的尖端及所有蝦腳，然後逐隻開邊備用。
4. 在碟上先鋪上粉絲，落少許蒜蓉醬（約1茶匙）拌勻，然後平均鋪在碟上。接着鋪上已開邊的海蝦，再平均塗上蒜蓉醬，最後灑上蔥花。
5. 燒熱一鑊熱水，水滾後放入預備好的蒜蓉蝦，用大火隔水蒸5-8分鐘（視乎蝦的大細而定）即成。

備註：

1. 海蝦買回家後，宜先放雪櫃冷藏，待烹煮前才拿出來清洗及劏，可保持新鮮及會較鮮味。
2. 用熱水浸粉絲除了可縮短浸水的時間外，還可把粉絲粉弄至五成熟，那就不用怕粉絲蒸唔熟或唔夠「淋」了；此外，用熱水浸透了的粉絲，由於已吸收足夠的水份，因此並不會吸乾蒜蓉汁，以致粉絲吃起來乾「曾曾」一「餅餅」咁；過冷河可令粉絲保持「挺」身，唔會蒸完變成一「pat pat」；粉絲一定要搾乾水份（可以用手搾），否則蒸起會更多水份，溝稀醬汁就唔好味了。
3. 蒸煮食物宜用金屬器皿，因傳熱較快，所需時間較短；若用瓷器盛載，便要酌量增加蒸煮的時間了。
4. 把蝦開邊的方法：左手把蝦背向後伸（蝦肚便譜迎尚刀鋒），右手用刀的末端（近刀柄處）將蝦尾先開一半（不要抽出刀），然後順著刀身往上切把蝦身平均開一半，最後用刀把蝦頭輕一刀，把蝦肚朝天，用左手大力向刀背拍下以把整隻蝦由頭至尾連殼也切成一半！

5. 如喜歡食蒜蓉，蒜蓉醬的份量可多加一半！

如要看更多製作過程的相片，請到：
http://www.facebook.com/media/set/?set=a.228121870591066.54326.160110140725573&type=1#!/media/set/?set=a.228121870591066.54326.160110140725573&type=1


If you like my recipe, please "Like" my page in Facebook! Thanks! ^_^

合桃提子辮辮包

My flavourite!! ^_^

我整的第一個pizza出爐喇！

係咪好靚呢？

扮晒嘢丹麥條

似丹麥條嗎？事先聲明這並不是正宗的丹麥條，只是我自創的檸蜜提子條，我用了黑糖麵團加提子乾一齊捲捲扭扭（自己發揮創意，隨意扭！我冇學過架！扭得靚嗎？似唔似街買嗰啲呢？^0^），成形後拎去焗，出爐後掃上加了檸檬汁的蜜糖就是了！味道九成九似，但吃起來就冇咁膩囉！^0^

Yeah! 成功！^_^

材料：

＜黑糖麵團＞

高筋麵粉 200g

低筋麵粉 50g

黑糖 50g

牛油 20g

蛋黃 2隻 （~40g）

鮮奶 90g

鹽 少許

酵母粉 4g

砂糖 5g

暖水 30g

提子乾 40g （份量隨意）

蜜糖 18g

檸檬汁 3g

做法：

1. 牛油室温放軟備用。


2. 將蜜糖及檸檬汁拌勻備用。


3. 加入30g暖水把酵母粉及4g砂糖拌勻至完全溶解，待酵母水冒出小氣泡後才使用（若須3-5分鐘）。


4. 在大碗中，放入所有材料（高粉 200g/低粉 50g/ 蛋黃 2隻/ 黑糖 45g/鮮奶 90g/鹽 少許）（牛油除外）用手拌勻，再加入酵母水搓成麵團。


5. 將麵團放於枱上，用手搓至不黏手及有彈性。（方法：一手按著麵團一端，另一手用掌心推開麵團，摺疊後再重覆以上動作）


6. 然後逐少拌入已放軟的牛油，再用手搓至不黏手及有彈性，可拉成薄膜即可。


7. 在大碗中，掃上一層油，放入巳搓成球狀的麵團，蓋上保鮮紙，放於溫暖的地方等待發酵（約1小時或麵團變成兩倍大）。


8. 用一隻手指沾上麵粉或油插入麵團中，若清楚地留下一個小洞，而麵團又沒有塌陷，即表示發酵完成。


9. 輕手將麵團撥出放在已灑上少訐麵粉的枱上，用刀切成八等份。


10. 逐一用掌心將麵團壓平（壓出空氣），然後好像包湯圓般向內收口及搓成球狀，用保鮮紙蓋着，讓麵團鬆弛15分鐘後（從包好第一個麵團後開始計時）才開始造形。





11. 


12. 將已做好的麵團放在已鋪牛油紙的焗盤上，蓋上保鮮紙，放入焗爐中（在下面放一盤熱水）進行第二次發酵，約1小時或麵團變成兩倍大。


13. 取出麵團及預熱焗爐於180度。


14. 揭開保鮮紙，在麵團表面掃上蛋汁。


15. 放入焗爐中，以180度焗15分鐘或至麵包表面呈金黄色，取出後立刻掃上檸蜜即成。

如要看更多製作過程的相片，請到：

If you like my recipe, please "Like" my page in Facebook! Thanks! ^_^

自家製 Hello Kitty 玉子豆腐.

今日去CitySuper逛，俾我買到支用來整豆腐嘅凝

固劑，真係好似執到寳咁開心呢！回家就立刻試整我想做好
耐嘅玉子豆腐喇，重用Hello Kitty 模來整添，Kawaii呢！^0^正呀！以後隨時都有新鮮無添加的豆腐和玉子豆腐食喇！Yeah!^_^

close-up！裡面好滑架！

材料：
大蕃茄 2個
肉碎 90g
粟米 40g
蒜蓉 少許

肉碎調味料：豉油 1茶匙 / 砂糖 1/2茶匙 / 麻油及胡椒粉 各少許
蕃茄汁調味： 1／4茶匙鹽 ／ 2茶匙 砂糖／ 粟粉水 少許

凝固劑: 鹽鹵

玉子豆腐材料：
蛋白 1隻
蛋黄 2個
豆漿 230g
凝固劑 2茶匙
鹽 1/8茶匙
砂糖 1/4茶匙

做法：

1. 將蛋輕輕打勻，然後過篩直接倒進豆漿中，再加少許鹽和糖拌勻備用。
2. 在模中先掃一層油，然後將豆漿平均倒入模中，大火蒸9分鐘即成玉子豆腐！
3. 肉碎落調味醃15分鐘，用少許油爆香蒜蓉再炒香肉碎，盛起備用。
4. 蕃茄洗淨後，去籽切絲備用。用少許油先炒蕃茄，再加粟米輕炒，落2茶匙糖及1／4鹽調味，然後落肉碎，再少許粟粉水煮至杰身即可上碟。
5. 最後鋪Hello Kitty玉子豆腐在上面即成。

備註：

1. 由於矽膠模傳熱比金屬器皿慢及Hello Kitty 公仔有一定厚度，因此才需要蒸8-9分鐘；若選用金屬器皿，而厚度像蒸水蛋般約半吋至一吋厚，就只需要蒸3-4分鐘即可。請根據所用器皿的傳熱程度及豆腐的厚度自行調較蒸煮的時間。若不太肯定，可於蒸了3分鐘後開蓋，輕輕提起器具的一角，看看豆腐的中央是否已凝結，若還未凝結，就多蒸2分鐘後重覆檢查一次，直至豆腐的中央完全凝結便可。
2. 由於玉子豆腐十分滑而很易整爛，因此脫模時要非常小心。可先在模上放一隻平的大碟，然後快手反轉，逐個模唧一唧直至玉子豆腐跌在碟上為止，然後再逐一用匙羹輕手將 Hello Kitty 玉子豆腐撥到另一隻已放茄汁的碟上即可。
3. 我是用博多屋的無糖豆漿做的，因為比較杰身和豆味濃些。若是用其他牌子的豆漿來做，就要留意豆漿會否太稀，若是比較稀的話，可選擇加多1隻蛋白或落多些鹽鹵來做，又或者用慢火把豆漿煮杰些放涼後才用。

如要看更多製作過程的相片，請到：

http://www.facebook.com/media/set/?set=a.222847754451811.53520.160110140725573&type=1

 

If you like my recipe, please "Like" my page in Facebook! Thanks! ^_^

Oreo 朱古力蛋糕仔

昨日是阿女去旅行嘅日子，於是我前晚便和阿女一同動手做

了一大袋oreo朱古力蛋糕仔，讓她帶去和同學仔一同分
享喇！又有得玩又有得食，滿足咗她兩個願望呢！^_^

材料：

蛋黃 3隻

原黑蔗糖 20g
低筋麵粉 50g
粟粉 5g
無糖朱古力粉 20g
油 35g
鮮奶 40g
72% Valrhona 朱古力

蛋白 3隻
砂糖 20g
檸檬汁 1茶匙
鹽 少許
Oreo餅碎 30g

做法：

1. 焗爐預熱170度。
2. 低筋麵粉、粟粉及朱古力粉過篩三次備用。
3. 將14g朱古力放入鮮奶中一同座溶成朱古力奶備用。
4. 用電動打蛋器將蛋黃及黑糖用高速打發成忌廉狀。
5. 將朱古力奶及油倒進蛋黃漿內，用電動打蛋器繼續打發1分鐘至完全混。
6. 逐少加入巳過篩的粉類，然後用拌入法輕手拌勻。
7. 用電動打蛋器以高速將蛋白打發至五成企身後，加入1茶匙檸檬汁及一小撮鹽，繼續以中速打發至八成企身後備用。
8. 用膠刮將已打發好的蛋白分三次輕手拌入朱古力漿內，直至至完全混合為止。
9. 將蛋糕糊注入蛋糕杯內至八成滿，然後灑上少許oreo餅碎。
10. 放入已預熱170度的焗爐中焗15-20分鐘，取出放涼後即可享用了。

備註：

1. 若不是做給太細的小朋友食，最好能用大一點的蛋糕杯來盛載或用6吋蛋糕模來焗，蛋糕會更加鬆軟可口。（因為我並沒有加入塔塔粉cream of tar tar來穩定蛋白，若要逐少焗小蛋糕，蛋糕糊放久了蛋白中的氣泡會流失，蛋糕便冇咁鬆軟了）
2. 我貪靚才將oreo餅碎放在蛋糕面，出爐後立刻食就脆卜卜，但放耐一點便會變軟，因此最好可以將餅碎混入蛋糕糊內一起焗便可避免。

如要看更多製作過程的相片，請到：

http://www.facebook.com/home.php?#!/media/set/?set=a.221781771225076.53394.160110140725573&type=1

If you like my recipe, please "Like" my page in Facebook! Thanks! ^_^

自製叉燒（用自製醃料，不用叉燒醬／柱侯醬／海鮮醬）

最近見好多媽咪都自製叉燒，賣相都好吸引呢！我都好想整啊，但又唔想用市面上現成的叉燒醬或海鮮醬來做，因為他們的成份中其實都含有紅色色素和防腐劑！剛巧看到電視介紹廚師怎樣製作叉燒，於是我又發揮我敢於左溝右溝的實驗精神^0^，用屋企有的調味料自己調較份量製成醃料做叉燒！

其實第一次做的叉燒已經好好味，但舊梅頭唔夠肥有啲韌同埋賣相差少少（黑「蚊」「蚊」咁）！於是第二次整時，我就買咗舊肥梅頭肉和用魚露代替部份豉油來做，結果成功喇！雖然不是100%似足市面上賣的叉燒（因為始終有啲材料如南乳、海鮮醬、柱侯醬.........等等我怕有色素和防腐劑，所以冇落！），但都有八九成似同好好味，最緊要係保證無色素無添加嘛！Yummy !Yummy! 阿女嗰晚食飯淨係掛住食叉燒，都唔記得食其他餸呢！你哋睇見係咪都覺得好吸引好想食呢？你哋都快啲試下整啦！^0^

材料：梅頭 約1斤

薑蓉 10g
蒜蓉 10g
乾葱 20g
豉油 60g
魚露 20g
清水 80g
油 60g
片糖 30g
冰糖20g
玫瑰露 3湯匙

麥芽糖水：熱滾水 120g

麥芽糖 30g

做法：

1. 梅頭洗淨瀝乾備用。
2. 薑、蒜蓉和乾葱切碎備用。
3. 用少許油起鑊，先把薑蓉爆香，再落蒜蓉和乾葱碎用慢火炒香，然後加入其他材料煮至糖全溶，熄火放涼後倒入保鮮袋中，放進梅頭，排出袋中空氣後封口，放進雪櫃醃遇夜（最少要醃5-6小時才夠入味）。
4. 以120g熱滾水把30g麥芽糖（圖示：約1湯匙）攪溶後備用。
5. 預熱焗爐於220度。
6. 用錫紙包着烤架，再用刀刺些小洞以便排走肉汁。
7. 將已醃好的梅頭放於架上，再放於已鋪錫紙的焗盤上，放入焗爐以220度焗15分鐘。
8. 15分鐘後，取出反轉再焗15分鐘。然後，用夾逐一取出梅頭放於碟上，用掃掃上一層麥芽糖水後再放入焗爐，焗2分鐘後取出再掃一層麥芽糖水，重覆做三次，然後反轉又重覆做三次。﹛若嫌麻煩，亦可每邊掃麥芽糖水後，分別焗6分鐘即可，但表面的麥芽糖coating會薄些、少些光澤和無咁好食！>.<）
9. 用小鍋把肉汁（掃麥芽糖水時，碟上會留下些肉汁）和剩餘的麥芽糖水煮滾後，加少許粟粉水煮至杰身後，即成叉燒汁。
10. 取出已焗好的叉燒，略為放凉後切片上碟，再淋上熱辣辣的叉燒汁即成。

如要看更多製作過程的相片，請到：

http://www.facebook.com/media/set/?set=a.223878441015409.53700.160110140725573&type=1

If you like my recipe, please "Like" my page in Facebook! Thanks! ^_^

超鬆軟芝士戚風蛋糕&香濃芝士戚風蛋糕

其實我好鍾意食芝士蛋糕架，只是傳統焗製的芝士蛋糕偏硬身和好膩，我多數吃二份一件就棄權！雖然日式芝士蛋糕食落無咁膩，但其實一個6吋蛋糕都要用一盒250g忌廉芝士整架，一樣係好heavy呢，同埋我略嫌唔夠芝士香味！！＞.＜
我心目中理想的芝士蛋糕係要鬆軟得嚟有香濃嘅芝士味，重要食落唔覺膩添！！相信市面上應該好難搵到喇，所以決定自己動手做！！

在網上只有幾個關於芝士戚風嘅食譜，但都不是我想要的，因為芝士的成份很少（約40g)，相信食落無乜芝士味！所以我就自己試用不同比例的材料嘗試做出我想要的芝士蛋糕，經過幾次失敗後，終於俾我研究到喇！我當然要同大家分享下我的成果啦，重一次過介紹兩個食譜俾大家添：（1）超鬆軟檸檬芝士戚風及（2）香濃芝士戚風蛋糕。

若你鍾情於戚風蛋糕那種獨特的又濕又輕又鬆軟嘅質地，可先嘗試食譜（1）超鬆軟檸檬芝士戚風。因為檸檬汁不但（可代替塔塔粉cream of tar tar)有穩定蛋白的作用，而且加入檸檬汁還可令芝士蛋糕吃來無咁膩添！

若想芝士味再濃些或不大喜歡檸檬味，就可選擇食譜（2）香濃芝士戚風蛋糕喇！但由於芝士比較重身，芝士嘅份量越多就要相應加多些低筋麵粉來做，焗出來的蛋糕才不致塌陷，所以香濃芝士戚風就相對地沒檸檬芝士戚風般鬆軟喇！

材料：(8吋/ 21cm戚風模）

＜超鬆軟檸檬芝士戚風＞
忌廉芝士 125g
無鹽牛油 60g
鮮奶 140g
低筋麵粉 115g
粟粉 15g
芝士粉 10g
蛋黃 5隻
蛋白 6隻
砂糖 100g
檸檬汁 15g

＜香濃芝士戚風蛋糕＞
忌廉芝士 125g
無鹽牛油 60g
鮮奶 160g
低筋麵粉 120g
粟粉 15g
芝士粉 30g
蛋黃 5隻
蛋白 6隻
砂糖 100g
檸檬汁 10g
鹽 少許

做法：

放進已鋪錫紙的底盤及預熱焗爐於175度。 忌廉芝士、無鹽牛油和鮮奶隔水煮溶後，倒進另一大碗內備用。 將已過篩的麵粉和栗粉分次加入芝士糊內，用打蛋器拌勻。 加入蛋黃拌勻後，再拌入芝士粉 。 用電動打蛋器把蛋白打至忌廉狀，再分次加入砂糖、檸檬汁和少許鹽打至八成企身。 用切入法將打起的蛋白分3次輕手拌入芝士糊內至完全拌勻。 將蛋糕糊慢慢倒入中空戚風模內，在枱上＂登＂二十下。 把已包錫紙的層架置於焗爐最頂層後，放入蛋糕模用175度焗40分鐘。 然後取出層架，轉用160度焗25分鐘，至蛋糕表面呈金黃色即可。 從焗爐取出蛋糕倒轉放涼。 待蛋糕完全放涼後，脫模即可。 備註： 芝士戚風其實會較整普通戚風難整，因為芝士較重身，若材料的份量差少少都很容易使之塌陷。 底盤鋪四層錫紙，用意在於避免蛋糕底部因太近發熱線而焗噥；而用錫紙把層架反覆包4層（上下合共八層錫紙）放於頂層，用意則在於避免蛋糕表面因過早烤熟變乾而爆裂，令蛋糕出爐後會回縮過度，變得無咁鬆軟。 做好的戚風蛋糕可在室溫存放一晚！若存放於雪櫃，則可儲存三日，蛋糕吃落仍是鬆軟濕潤的！ 若不想加入芝士粉，可選用檸檬芝士戚風的食譜，所有材料份量不變（只是不加芝士粉）。若不喜歡檸檬的味道，可減少檸檬汁的份量至5g(~1茶匙），或用1茶匙的塔塔粉（cream of tar tar)代替。 戚風模是特別設計成中間通風，除了傳熱快之餘，中間那條「通」還有助蛋糕向上爬升！蛋糕升得越高等於蛋糕越鬆軟！ 因此用其他模具做戚風蛋糕（尤其是圓形蛋糕模），效果會無咁鬆軟，因為放涼時，蛋糕的中間部份（因為無得依附）會縮回很多，變得結實而唔夠鬆軟了！ 若真的不想買戚風模，可用長方型的麵包模（loaf pan)，因為四面都能平均受熱，而蛋糕四邊都有得依附，升得高之餘亦不會回縮太多！ 如要看更多製作過程的相片，請到： http://www.facebook.com/media/set/?set=a.217741721629081.52732.160110140725573& If you like my recipe, please "Like" my page in Facebook! Thanks! ^_^

成功喇！甜餐包原來好易整！

試過第一晚做的甜餐包後，根據個人口味對食譜作出了調整，結果焗出來的餐包脹卜卜好靚仔，好鬆軟，好好味啊！我忍唔住口，夜「嗎嗎」都吃了兩個新鮮出爐的甜餐包呢(因為我又「午夜整餅」喇）！！^0^
我覺得好味過街賣嗰啲喎！因此可以和大家分享食譜了，由其是那些同我一樣是整麵包新手的朋友，不妨試下啦，好有滿足感啊！^_^

材料：
高筋麵粉 250g
砂糖 50g
雞蛋 1隻
酵母粉 4g
鮮奶 50g
清水 50g
牛油 20g
鹽 少許

做法：

1. 牛油室温放軟備用。
2. 加入50g暖水把酵母粉及5g砂糖拌勻至完全溶解。
3. 在大碗中，放入所有材料（高粉 250g/砂糖 45g/雞蛋 1隻/ 鮮奶 50g/鹽 少許）（牛油除外）用手拌勻，再加入酵母水搓成麵團。
4. 將麵團放於枱上，用手搓至不黏手及有彈性。（方法：一手按著麵團一端，另一手用掌心推開麵團，摺疊後再重覆以上動作）
5. 然後逐少拌入已放軟的牛油，再用手搓至不黏手及有彈性，可拉成薄膜即可。
6. 在大碗中，掃上一層油，放入巳搓成球狀的麵團，蓋上保鮮紙，放於溫暖的地方等待發酵（約1小時或麵團變成兩倍大）。
7. 用一隻手指沾上麵粉或油插入麵團中，若清楚地留下一個小洞，而麵團又沒有塌陷，即表示發酵完成。
8. 輕手將麵團撥出放在已灑上少訐麵粉的枱上，用刀切成八等份。
9. 逐一用掌心輕輕壓平（壓出空氣），然後好像包湯圓般向內收口成球狀，放在已鋪牛油紙的焗盤上，蓋上保鮮紙，放入焗爐中（在下面放一盤熱水）進行第二次發酵，約1小時或麵團變成兩倍大。
10. 取出麵團及預熱焗爐於180度。
11. 揭開保鮮紙，在麵團表面掃上蛋汁。
12. 放入焗爐中，以180度焗12-15分鐘，至麵包表面呈金黄色即可。

如要看更多製作過程的相片，請到：
http://www.facebook.com/media/set/?set=a.216473991755854.52434.160110140725573&type=1

If you like my recipe, please "Like" my page in Facebook! Thanks! ^_^

我焗的第一盤包包

上星期睇完東張西望，講出面賣的麵包落咗好多色素和添加劑，昨晚終於「的」起心肝試做咗我第一盤麵包喇，係最簡單的甜餐包！^_^未試過之前，一諗起要等發酵幾次，好似好麻煩咁，又怕自己冇記性，放埋一邊會唔記得咗，所以遲遲都冇動手做................>.<
但原來整麵包又唔係想像中咁難同咁麻煩喎，重幾好玩添！^0^

雖然塗蛋漿時唔夠快手，麵團有啲縮回少許，但至少發酵成功，又焗得成型吖（我第一次整，好低要求咋！），食落味道都唔錯，阿女就嫌淡少少（我食就覺得夠甜，但佢食慣外面的甜餐包），不過第一次整重有得食（我預咗會失敗要丟架！），我已經好滿意，今晚一於再整過！^0^

蒜蓉蒸象拔蚝仔

象拔仔好鮮甜架，想食好耐架喇，但上星期賣$80斤好貴啊，所以忍手又忍口唔買住。今日去街市買餸，見到啲象拔仔好肥美啊，重賣平咗添，$48斤咋，即刻買咗兩斤返屋企煮俾老公同阿女嘆下！^0^

其實象拔仔可以好似扇貝咁原隻連殼用蒜蓉蒸，但一來連殼好難洗得乾淨，二來為咗懶惰爸同阿女可以食得方便啲，今次我就將象拔仔去殼後加粉絲墊底（因為阿女超鍾意食粉絲）用蒜蓉蒸！

噢！好正啊！阿爸同阿女都食到舔舔脷，不消15分鐘就俾佢哋食晒喇，重大叫明天要再食過添！嘻嘻！^0^

材料：
象拔蚝仔 2斤 (約有16隻）
粉絲 40g
蔥花 少許

蒜蓉醬材料：
蒜蓉 40g
薑蓉 3g
豉油 1茶匙
砂糖 1/2茶匙
鹽 1/3茶匙
胡椒粉、麻油 各少許
油 1-2湯匙

蒜蓉醬做法：
將鑊燒熱後，落1-2湯匙油把薑蓉和一半蒜蓉爆香，用碗盛起，然後加入餘下的蒜蓉及其他調味料拌勻即成。


做法：

1. 預備蒜蓉醬。
2. 用熱水浸軟粉絲（約10分鐘）後，瀝乾備用。
3. 將象拔蚝仔去殼洗淨後，瀝乾備用。
4. 在碟上先鋪上粉絲，落少許（約1茶匙）蒜蓉醬拌勻，然後平均鋪在碟上。接著鋪上象拔蚝仔，再平均塗上蒜蓉醬，最後灑上蔥花。
5. 燒熱一鑊熱水，水滾後放入預備好的象拔蚝仔，用大火隔水蒸8分鐘即成。

備註：

1. 象拔蚝仔買回家後，宜先放雪櫃冷藏，待烹煮前才拿出來清洗及劏，可保持新鮮及會較鮮味。
2. 粉絲一定要搾乾水份（可以用手搾），否則蒸起會更多水份，溝稀醬汁就唔好味了。
3. 蒸煮食物宜用金屬器皿，因傳熱較快，所需時間較短；若用瓷器盛載，便要酌量增加蒸煮的時間了。
4. 劏象拔蚝仔的方法：

新鮮未劏的象拔蚝仔

  

（左）：未劏的象拔蚝仔
（中）：在中間劏一刀（把「象拔」開一半）然後  把殼左右張開
（右）：拿著「象拔」往下扯

在中間劏一刀（把「象拔」開一半）然後  把殼左右張開
＜ 放大圖 ＞

 





從「象拔」的頂端往下扯出滑潺潺的「衣」不要。

 



灑上粟粉再捽，有助徹底去除滑潺潺的「衣」。



清洗乾淨的象拔蚝仔

如要看更多製作過程的相片，請到：
http://www.facebook.com/media/set/?set=a.215298075206779.52137.160110140725573&type=1


If you like my recipe, please "Like" my page in Facebook! Thanks! ^_^

今晚老公的宵夜- 扒火腿芝士多士

老公今晚好夜收工又冇食晚飯，於是我就為他做了兩份扒火腿芝士多士，他很開心好滿足呢！因為我巳經好耐冇整過俾佢食了！^0^

餐廳下午茶都有扒芝士火腿多士賣，都要成$20份架！好貴好唔抵呢！而且重超多牛油喺面好膩呢！都係自己整正啲！好易整架咋，只須15分鐘就整好食得喇！
我估老公明晚一定要encore再食呢！^_^

材料：
麥飽 2片
火腿 1片
芝士 1-2片
牛油 少許

做法：

椰汁紫米露

椰汁紫米露是我最愛的糖水之一，紫米重可以補血添！真係又好味又有益呢！^_^

材料：
清水 3L
黑糯米 150g
麥米 50g
西米 50g
椰漿 150g
冰糖 130g

做法：

1. 黑糯米和麥米分別用水洗淨瀝乾備用。
2. 煲一小鍋水，水滾後落西米，細火煮8分鐘，然後落1.5湯匙砂糖拌勻，合上煲蓋後熄火。（落之前才將西米過冷河及隔去水份）
3. 用大鍋燒熱3L清水，水滾後落黑糯米和麥米，大火煲1小時。
4. 然後落冰糖和西米再多煮10-15分鐘至冰糖全溶，最後落椰漿拌勻及再煮滾後熄火，即成。

備註：

1. 若不想另外買麥米，亦可以用同等份量嘅黑糯米代替。但由於麥米較煙"UN"及有黏性，再加上西米一起煮後，除了會較有口感外，質地亦會較似粥，好味啲；否則，若只是落黑糯米，質地就會較稀了。
2. 剛煮好時會較稀，宜熄火後多焗15-30分鐘後才享用，會較入味和杰身，好味啲。

如要看更多製作過程的相片，請到：
http://www.facebook.com/media/set/?set=a.212363772166876.51365.160110140725573&type=1

If you like my recipe, please "Like" my page in Facebook! Thanks! ^_^

家鄉煎耦餅

上次在婆婆家煮過一次，但由於無量食材的工具（如食物磅），所以一直無法寫食譜和大家分享！加上我老公和阿女都唔鍾意食蓮耦，因此一直無機會再煮............＞.＜

終於等到我阿姨今晚來我家吃晚飯，我就立刻到街市買了兩舊蓮耦回來，炮製這款在餐廳和酒樓都好難食到嘅家鄉煎耦餅喇！正呀！我重一次過煎了兩大碟添，一碟今晚食，另一碟就留番明天再食過！嘻嘻！^0^

＜終於可以補寫返個食譜俾大家喇！^_^ ＞

材料：
蓮耦 800g
豬肉 70g
臘肉 30g （1/4條）
臘腸 20g （半條）
冬菇 2隻
葱粒 15g（份量隨意）

調味：
醃肉- 豉油１1/3茶匙 / 砂糖 1/2茶匙 / 麻油、胡椒粉 各少許
蓮耦 - 鹽 ｌ茶匙 / 粟粉 ｌ湯匙

做法：

1. 冬菇用水浸開後，和已洗淨的臘腸及臘肉一齊蒸20分鐘（我就用碟放飯面蒸），然後取出切粒。將鑊燒熱後，先落臘腸和臘肉炒香，然後再落冬菇粒輕炒一會後，盛起備用。
2. 豬肉剁碎後落調味醃15分鐘，然後用少許蒜蓉起鑊，把肉碎爆香後盛起備用。
3. 蓮耦洗淨後去皮，用細孔刨把蓮耦磨成蓉，然後落鹽和粟粉拌勻，再落所有材料和葱粒一起拌勻。
4. 將鑊燒熱後，落少許油，然後用手將蓮耦蓉輕輕搓成小圓球，遂一放進鑊中用慢火把兩邊煎香後，即可上碟享用。

備註：

1. 買蓮耦盡量買那些有泥黏住的，若是沒有就盡量揀些表皮較深色的，因為那些很乾淨又淺色的多數給漂過，吃了無益！

2. 若想吃起來更香，亦可加少許蝦米吊味（洗淨及浸開後切碎，然後和臘味同炒或用少許油炒香備用）。
3. 如不想用臘味來煮，亦可以加同等份量的豬肉或魚肉代替。
4. 若不是用易潔鑊來煎又不想黏鑊，就一定要先將鑊燒熱，然後落1／2至1湯匙油，一定要待油熱才可放蓮耦餅落鑊煎！要讓蓮耦餅先煎一會，再慢慢逐少壓平煎香（要慢和不能太大力，否則會散開！），然後才反轉另一邊再煎至金黃色即成！注意油不能太少（反轉後可酌量加少許油來煎），否則就不能煎成金黃色，吃起就來不香了。
5. 用手搓蓮耦餅時，要輕手慢慢搓成小圓球，然後輕輕壓扁少許才落鑊煎。切記不要大力壓，否則會散之餘更會搾出過多蓮耦汁，吃起會太乾不好吃了。

如要看更多製作過程的相片，請到：
http://www.facebook.com/media/set/?set=a.211535002249753.51190.160110140725573&type=1

If you like my recipe, please "Like" my page in Facebook! Thanks! ^_^

卜卜脆雞塊（不須油炸亦不用落油）

若喜歡吃香口食物，但又怕油炸肥膩，一於試下我這個不需落油亦不用油炸的卜卜脆雞塊啦！由於粟米片本身巳是脆卜卜，因此就算焗好後放數小時才吃，都仍然是卜卜脆的，最啱用來做party小食或給子女做愛心飯盒喇！小朋友見到一定十分開心呢！可選擇蘸茄汁或沙律醬來吃，若是用來送飯就可用粟米汁或西擰汁，想起都正呀！哈哈！^0^

今晚我就預備了西檸汁，但老公同阿女見到這「疑似炸雞」都急不及待放入囗中品嘗了，都來不及蘸汁呢！
今晚是我第一次試做這款新菜式，所以做的份量較少，每人得兩件雞塊，食到他們舔舔嘴唔多夠喉呢，下次要整多啲先得！^0^

影相時唔夠光，所以看起走比較深色！一啲都唔燶！！>.<

材料：
雞脾 1隻 （雞肉 130g）
粟米片 60g （用原味無加糖的粟米片）‧
雞蛋 1隻
粟粉 適量

調味：（醃肉）
豉油 1.5茶匙／砂糖 0.5茶匙／麻油及胡椒粉 各少許

做法：

1. 焗爐預熱180度。
2. 雞脾洗淨後，去皮去骨及切件，落調味醃15分鐘備用。
3. 將粟米片放入保鮮袋內，用刀柄隔袋把粟米片弄碎後，倒進碟中備用。
4. 用叉把雞蛋輕輕打發均勻後，落少許鹽拌勻備用。
5. 把適量粟粉倒進大碗中備用。
6. 逐一將雞塊先撲一層粟粉，再蘸蛋汁，然後每邊灑適量粟米片碎再輕輕壓實。
7. 將雞塊放在已鋪牛油紙的焗盤上，放入焗爐用180度焗15分鐘，然後將雞塊反轉再焗15分鐘，總共焗30分鐘後，取出放涼一點後即可享用。

備註：

1. 西檸汁做法：檸檬汁 30g
   清水 120g
   砂糖 1.5 湯匙
   粟粉水（粟粉 2茶匙 加 清水 4茶匙）
   
   將檸檬汁、砂糖和清水放在鑊中用中火煮滾，然後邊攪邊落粟粉水，煮至杰身即成！
2. 除了雞塊，此方法還可用來整豬扒、魚柳、雞翼等等，但應盡量把肉類切得比較細件及薄身，以致不用焗太耐都可煮至全熟。

如要看更多製作過程的相片，請到：
http://www.facebook.com/home.php?#!/media/set/?set=a.209865772416676.50765.160110140725573&type=1

If you like my recipe, please "Like" my page in Facebook! Thanks! ^_^