好開心呀！^_^

我個blog嘅瀏覽數次數今日突破5000次啦(只係短短一個月)！真係好開心呀！​多謝大家支持！^_^

其實我不嬲都鍾意整野食嫁，過以前就好少會影相做紀綠，重好多時都冇記低食譜，攪到有時想再整返都唔記得點整！>.<

到去年年底才開始整蛋糕和曲奇餅，就開始影低啲相在 facebook 同我啲朋友仔分享！
但越整越多後，我又怕post得太密會悶親我啲朋友，始終唔係個個都鍾意整嘢食嘛！

終於喺朋友Sherine鼓勵下，上個月起終於「的」起心肝開始寫blog喇！

但我發覺原來唔係個個都可以喺個blog到留言嫁，都唔知究竟別人有冇興趣和鍾唔鍾意！
冇乜feedback真係冇乜動力寫食譜嫁(因為唔識打中文，用手寫版嚟寫真係好慢好麻)！

但自從係 Baby Kingdom 分享後，見咁多人欣賞我的食物，真係超開心呢！

我要返工嫁，只係請part-time姨姨朝早湊阿女(阿女返下午班）我就返工，回家湊完阿女返學後我又再返工！放工後又要煮飯湊女，要等佢瞓咗先開始「阿戊整餅」，整完通常都已三更半夜了！

其實我真係冇乜時間寫食譜和寫blog嫁！

不過，我宜家好似上咗癮咁，就算返工嘅時候都常常諗，重有乜嘢可以整嚟同大家分享呢？嘻嘻！

希望大家可以多啲喺 BK或 facebook回應我吖，我會繼續寫多啲食譜和大家分享嫁喇！！

士多啤梨軟雪糕

今日又整咗士多啤梨雪糕，不過今次又搞搞新意思，類似 frozen yogurt 嘅食法！睇落喺咪好吸引呢？ ^_^

其實我只不過將做好嘅雪糕放入唧袋內，然後再封口放進雪櫃再雪半小時，讓雪糕較為硬身後才唧入杯內，再放一些生果和果仁，便成為如此吸引嘅軟雪糕喇！

如果屋企有小朋友，重可以到超市買現成的雪糕筒，咁以後係屋企都可以食到軟雪糕啦！

小朋友重可以試吓自己唧雪糕，佢哋實開心到飛起呢！

如果將食譜內的cream用3湯匙的純乳酪代替，便真係喺屋企都做到 frozen yogurt，唔駛再幫襯出面街嗰啲幾十蚊一碗既 Froyo喇！

士多啤梨雪糕食譜，請參考這裡：
http://jen12399.blogspot.com/2011/07/blog-post.html



-- 發送自我的 iPhone

香脆蜜糖焗杏仁 (超易整美味小食推介)

昨晚除了焗咗個Oreo朱古力戚風蛋糕俾阿女帶返學校外，重手痕整咗呢個 honey roasted almonds 俾同學仔開大食會時做小食！！

其實我不嬲都好鍾意食蜜糖焗杏仁嫁！會買鑽石牌嗰隻，不過都幾貴下，一包得少少嫁喳！ 以前冇諗過可以自己整嫁，以為係好複雜嘅事！不過前幾日無意中發現咗個食譜，於是就趁呢個機會（開大食會）整嚟試下啦！！

嘩！！原來係超易整重超好味添！！ 重可以和仔女一齊做，攪下攪下就整好嫁啦！！ 真係超容易！你都快啲試下整！暑假開始就可以和子女親子吓啦！！^_^

如果想睇多啲製作過程，請到 Facebook:
http://www.facebook.com/home.php?#!/media/set/?set=a.163548967048357.40932.160110140725573

材料：
杏仁 300g
蜜糖 2湯匙
清水 2湯匙
油 1.5 湯匙
砂糖 30g
幼鹽 2g

做法：

1. 預熱焗爐在180度，然後放入杏仁焗約10-15分鐘至表皮轉為較深的啡色。
2. 取出焗好的杏仁平均鋪在墊有錫紙的架上放涼。
3. 將砂糖和幼鹽放入大湯碗內拌勻備用。
4. 將蜜糖、淸水和油放入鍋中用中火煮滾後轉為細火，然後放進杏仁，用木勺不停攪拌至所有蜜糖汁完全被杏仁吸收便可熄火。
5. 用木勺將杏仁舀起，放進砂糖中拌勻後，立刻倒在墊有牛油紙的架上平均鋪好放涼。
6. 杏仁完全放涼後，便可放進密實瓶中存放了。

備註：

1. 做法（1）的杏仁不要焗得太深色，因為做法（4）最後剩下的油會把杏仁再炸得香和脆一些，杏仁因此會再轉深色一點！
2. 這是我第一次做這個小食，雖然我已將原來食譜中的油、砂糖和鹽的份量減半，但若是做給小朋友做小食的話，可以再減1／3分量來做會較為健康！
   
   
   
   

簡簡單又一餐 --> 芝士汁三文魚意粉

今日阿女放學，睇到學校通告先知明天要帶蛋糕和同學分享喎！真係好突然！
因為要整蛋糕，所以今晚就煮得簡單一點，不過都好好味嫁！^_^

我唔係好識煮西餐，冇試過整白汁，只是用卡X片裝芝士做芝士汁喳！只要將所有材料炒熟加芝士煮溶，落意粉炒勻調味就食得喇！

真係快！靚！正！^_^

雞蛋仔(用最少材料和功具的方法）

今天剛收工，突然收到舅父的來電，話有個雞蛋仔摸想我教表妹整雞蛋仔喎！真喺好突然！！

喺從未整過兼冇乜功具(因為唔係我屋企)又材料唔齊的情況下，終於整咗第一次雞蛋仔喇！
雖然因為婆婆屋企(因為婆婆有糖尿病，煮餸甚少落糖)只得20g糖而唔夠甜外，食落和睇落都幾似摸似樣吖！

不過真係幾好玩嫁，一於去上海街買返個嚟同阿女喺屋企玩下先！^_^




用叉輕手挑出雞蛋仔


材料：
自發粉 140g
雞蛋 2隻
砂糖 80g
清水140g
淡奶 2湯匙
油 2湯匙

做法：

1. 自發粉過篩後備用。
2. 雞蛋加砂糖拌勻後，再逐少加入淡奶及清水拌勻。
3. 逐少篩入自發粉拌勻至沒有粉粒為止。
4. 最後加入2湯匙油拌勻即成雞蛋糊。
5. 將拌好的雞蛋糊置室溫最少半小時後方可使用。
6. 把雞蛋仔模兩邊燒熱後，掃上一層油。
7. 把雞蛋糊倒進模內至8成滿，立刻反轉搖勻，再放回爐上。
8. 每邊各用中火燒約45秒，至蛋漿熟透離模成金黃色。
9. 用叉慢慢把雞蛋仔挑出，彎彎地放在碟上，放涼一會即可趁熱享用。

備註：
若想雞蛋仔脆些:

• 可先將拌好的雞蛋糊放進雪櫃冷藏一小時，再取出放室溫半小時回暖後才使用；
• 可用少一些雞蛋糊（約六成滿）來做，雞蛋仔會薄一些比較脆口，但有機會有些雞蛋仔不成形（因雞蛋糊放得不平均），所以就要搖多幾下才放回爐上燒。
• 脫模後的雞蛋仔，最好用風吹一會待稍為硬身後，才享用便會比較脆口。

輕怡士多啤梨雪糕 ( 不用雪糕機、不用加蛋黄 )

我一直都好想買部雪糕機自己整雪糕嫁，不過我個冰箱成日都好滿，實在無辨法容得下雪糕機那個要雪藏的內膽！唯有放棄！>.<

本來我又想用傳統的方法用攪拌機做雪糕，但想起要每隔一陣就要拿出來攪一攪便覺得十分麻煩，所以一直都沒有整過雪糕！

其實，我常常都用blender做乳酪雪糕嫁(因為又健康又易做)，但原來用同樣的方法，唔用乳酪而改用淡忌廉，便可做成美味的輕怡雪糕喇(因為無蛋、少糖、少cream又無奶）！Yeah！

宜家唔駛買雪糕機喇，又唔駛好似傳統方法咁每隔一陣就拿出來攪拌！真方便！^_^

呢個方法好易整嫁，你都試下啦！

材料﹕

士多啤梨 200g

淡忌廉 100g

糖粉 10g (這份量是少甜版，請根據個人口味和士多啤梨的甜度自行調較)

做法﹕

1. 士多啤梨洗淨切成大粒，放進冰箱雪至硬身。
2. 將所有材料放進電動攪拌器內打至滑身。
3. 將雪糕糊倒進小杯內，冷藏至硬身即成。

備註：

1. 若想易些打碎，可先落一部份士多啤梨加全部淡忌廉打至滑身，然後再將餘下的士多啤梨逐少加入再打至軟滑。
2. 如想增加口感，可以把一些士多啤梨(份量隨意)切成小粒或用攪拌器微微打碎，放入已做好的雪糕糊內輕手拌勻才放冰格冷藏，吃雪糕時便可吃到新鮮果肉了。

英文食譜及做法的圖片在此:

http://www.facebook.com/pages/Jennifers-Kitchen/160110140725573#!/media/set/?set=a.160596870676900.40327.160110140725573

Oreo cheese cake

今天下午約了好耐無見的朋友食飯，答應了會整個芝士蛋糕送給他！
查實我已有半年冇整過芝士蛋糕啦！(第一次是整日式芝士蛋糕，第二次就整籃莓芝士蛋糕，今次是我第三次整芝士蛋糕)！ 今次還一次過做了兩個添！

第一次做這款Oreo芝士蛋糕，食譜是上網找的，只是慣常地減少糖的份量。 今早返工前切了一個試味......唔太甜好好味呀！ 整芝士餅比戚風蛋糕易做好多，送禮一流，大家值得一試！
( 食譜改良自foodbook.com迪比廚房）

材料：(6吋圓模)
忌廉芝士 250g
砂糖 45g
雞蛋 2隻
淡忌廉 80g
Oreo 餅乾 3片(揑成小塊)
Oreo 餅碎 10g

餅底材料:
Oreo 餅碎 80g
牛油 30g

做法:

1. 忌廉芝士及雞蛋放室温(約半小時或以上)備用。
2. 首先把座溶牛油與80g餅碎拌勻，平均鋪在巳墊有牛油紙的餅模內並壓實，然後放進雪櫃備用。
3. 預熱焗在175度。
4. 把忌廉芝士切成小塊，加入砂糖用電動打蛋器攪至滑身。
5. 加入淡忌廉攪至完全混合。
6. 加雞蛋，再攪至完全混合。
7. 加入10gOreo餅碎及揑成小塊的Oreo餅乾，然後輕手拌勻。
8. 用一塊鍚紙包住餅模的底部，然後倒入蛋糕糊。
9. 把蛋糕模放入注了熱水的平底金屬盤中。
10. 用175度焗約50分鐘至表面呈金黃色。
11. 取出蛋糕，放在架上放涼。
12. 待完全放涼，放進雪櫃冷藏後(最好放過夜)便可切件享用了。

備註:
用水蒸焗的方法，可避免蛋糕表面裂開。但我較喜歡乾身的芝士餅，所以只在焗盤內注入約0.5cm深的熱水。約40分鐘後，所有的水份都會全部蒸發掉，餘下時間便較易把蛋糕焗成金黃色又乾身了。