2013年12月27日 星期五

自製臘肉

整完臘腸,趁天氣好趕製埋臘肉先!
今年已是第四年自製臘肉了,我選用了未加防腐劑的新鮮五花腩(要預訂架!)、有機砂糖、有機海鹽、玫瑰露和汾酒來做臘肉 。
用優質食材來做,吃得安心又美味,而且自己曬又衛生啲,你哋都試下整啦!


2013年12月15日 星期日

自製臘腸

今年終於買到腸衣可以試整臘腸,好興奮啊!等咗10日自製臘腸終於食得喇!我急不及待即刻整個臘腸飯試食,結果出奇地好味啊!
自製的臘腸蒸起來居然冇出油,味道十足十和街買的一樣,還吃出淡淡的黑胡椒香味,只是因為肥豬肉的份量比街買的少了一大截,所以略為硬少少,但我覺得十分滿意,一於下次整多啲和親朋好友分享先!
大成功!Yeah!! ^0^





2013年4月18日 星期四

乾煎大蝦碌

我煮蝦甚少是連殻煮的,多數都是開邊煎/蒸、炒蝦仁或炸蝦餅,皆因我家老爺和小姐都是唔搣蝦殼的!>.<

昨晚經過街市,見到啲大大隻嘅花竹蝦又靚又生猛,都只是賣$148斤(之前要$350斤架,真唔捨得買!)!於是,我就買咗斤幾蝦返屋企煮嚟慢慢嘆喇!^0^

我前天才第一次整乾煎蝦碌,用了生抽煮,好味但略嫌煮出嚟唔夠靚仔(顏色較深色)!因此,我今次就轉用魚露來煮,出嚟又鮮味啲又夠靚仔,好好味啊!我連蝦頭都食埋(我平時唔食蝦頭架),因為個蝦頭煎到卜卜脆又索晒啲汁,而且重有好多蝦肉喺入面架,我和阿姨(昨晚她來我家吃晚飯)食到舔舔脷,好滿足啊!^0^

好易煮架,大家都趁最近啲蝦咁靚,買返啲煮嚟嘆下啦!^_^



材料:
大花竹蝦 16隻
薑 3片
蒜蓉 半湯匙
蔥花 少許
米酒 2茶匙

調味:
魚露 1湯匙
砂糖 1茶匙
粟粉 1/3茶匙
清水 1.5湯匙

做法:
  1. 將大蝦頭頂的尖角、觸鬚和蝦腳剪去,洗淨後抹乾水份備用。
  2. 用大火將鑊燒熱後,落2湯匙油爆香薑片,然後轉細火把蝦的兩邊慢慢煎香(反轉煎另一邊時,可多落1湯匙油來煎,蝦殻會香脆一些)。
  3. 當蝦的兩邊都煎香後,轉大火,馬上攢酒炒勻,再落蒜蓉及蔥花炒香,最後落已拌勻的調味料,再快手炒勻及收乾水份後,即可上碟享用。

備註:
  1. 我選用新鮮蝦,因為新鮮蝦的蝦肉較鮮甜及肉質較爽;但其實也可用雪藏蝦來煮,只是肉質較「淋」和冇咁鮮甜,而且雪藏蝦煮熟後,蝦頭會變黑,冇咁靚仔!

  2. 蒜蓉剁碎後,可先加入少許油拌勻,那麼落鑊炒時,便冇咁黏鑊了!

若想看多些製作圖片,請到:

If you like my recipe, please "Like" my page in Facebook, Thanks! ^_^

2013年3月27日 星期三

自製香滑芝麻糊

好耐冇食過芝麻糊喇!因為在街外實在吃不到似樣的芝麻糊,通常都是又稀又唔香,真的不吃也罷!

其實我想整好耐架喇,今晚終於「的」起心肝動手做,因為近排發現頭頂多咗好多白頭髮呀!一於食多碗補補先!

我細個嗰時就成日同家人整不同嘅糊(包括芝麻糊、花生糊、杏仁糊、合桃糊......),但自己動手做還是第一次!你哋話我整得靚嗎?

講真!真係好香、好滑、好好味啊!^0^

材料:
黑芝麻 250g
白芝麻 1湯匙
粘米 60g
清水 1600ml
冰糖 135g

做法:


  1. 黑白芝麻洗淨後瀝乾水份,用白鑊(不用落油炒)炒乾,直至聞到香味或白芝麻呈微微金黃色,即可盛起備用。

  2. 粘米洗淨後瀝乾水份(亦可選擇不洗),用白鑊(不用落油炒)炒香,直至粘米由少許透明轉為白色或微微金黃色,即可盛起備用。

  3. 將炒好的芝麻及粘米拌勻後加入1L清水,用攪拌機打爛成糊(分開兩份來攪會比較容易),然後用布袋(魚袋或豆漿袋)隔渣,用手慢慢搾出芝麻漿(直接倒進鍋中)。將剩下的芝麻渣加入600ml清水,用攪拌機再打爛一次,然後再隔渣搾出餘下的芝麻漿。

  4. 將135g冰糖加入盛有芝麻漿的小鍋中,用中火將芝麻漿煮滾後轉細火多煮一分鐘左右即成。(其間須用木勺慢慢攪動,以免芝麻糊結成一舊舊或沉底易燶!)

備註:


  1. 黑芝麻的營養成份主要為脂肪、蛋白質、醣類,並含有豐富的膳食纖維、維生素B群、E與鎂、鉀、鋅及多種微量礦物質。

  2. 根據《本草綱目》,芝麻味甘、性平,是屬於強壯滋養藥物,而且能補中益氣、滋養五臟、強健筋骨、潤滑腸胃。芝麻還是治療脫髮,痔瘡的食材,經常吃芝麻能使頭髮烏黑。《本草求真》說:「胡麻補血、暖脾、耐飢。凡鬚髮不烏,以投。」<節錄自維基百科>

  3. 我用的是點點綠有機黑芝麻,雖然貴少少,但勝在真空包裝較衛生之餘又冇雜質,洗芝麻時摼番唔少功夫!

  4. 手握式的攪拌器馬力不夠(我用Bamix都攪咗好耐),要花很長時間將芝麻和粘米打碎;因此,最好用大座、可以用來打碎冰那種攪拌機!

若想看多些製作圖片,請到:


If you like my recipe, please "Like" my page in Facebook, Thanks! ^_^

2013年2月3日 星期日

炸芽菇片

今晩第一次炸芽菇片,原來又幾好玩喎,重好好味添!不過,最衰我個用來切片嘅食物處理器都係第一次「開張」,開頭我唔係好識控制,攪到切碎咗好多芽菇!>.<
最後,只係得一碟製成品,我用曲奇袋盛起再用封口機封好,看起來好「西化」啊,似薯片多啲呢!一啲都唔似賀年食品-炸芽菇片啊!

啲芽菇片係咪炸得好靚仔,好想即刻拆開一包嚟食呢?

我聽日一於再去買多啲芽菇再炸過先得!我諗用嚟送禮都應該唔錯,起碼無蒸糕咁大工程嘛!^_^



2013年1月30日 星期三

Bear Bear 肉碎蒸蛋

成日整花花,阿女開始覺得冇乜特別!於是,今晚我就手痕痕用刀削咗啲Bear Bear紅蘿蔔嚟放喺蒸水蛋上面喇!靚唔靚呢?

阿女見到好開心啊,舀咗好多肉碎蒸蛋來撈飯之餘,重將所有Bear Bear食晒添!

你哋有時間都試下啦!



食譜與花花肉碎蒸蛋相同


花花肉碎蒸蛋

阿女超鍾意食雞蛋,唔想成日蕃茄炒蛋、三文魚炒蛋咁悶,於是我今日煮了這個花花肉碎蒸水蛋俾阿女食喇!

阿女見到超開心呀,食咗大半碟呢!!

如果大家家裡有食飯坐唔定嘅小朋友,不妨試下煮這個花花肉碎蒸水蛋吖,小朋友不但食得開心,用來撈飯食一流!!
就算小朋友冇心機食飯,淨係食這蒸水蛋,有蛋有肉有紅蘿蔔,亦營養豐富兼飽肚,真係唔錯架!!

其實只須花少少心思來整架咋,希望你和小朋友們都食得開心啦!



材料:
雞蛋 3隻 (我用CP XL 大蛋 ~180g)
清水 200ml (用已煲過的暖開水)
甘荀 適量
肉碎 40g
葱花 少許
食油 少許

做法:
  1. 將小甘筍去皮,用小刀削成花花形狀,切成薄片後,隔水蒸5分鐘。(我放飯面蒸!)
  2. 肉碎加入調味(鹽1/8茶匙、糖1/ 4茶匙、胡椒粉及麻油各少許)醃10分鐘備用。
  3. 將雞蛋輕輕打發均勻後,加入1/ 4茶匙鹽調味,然後再加入 200ml 清水拌勻,撇掉浮面的泡泡,撒上蔥花及少許油,用中火蒸 5分鐘後,熄火再焗 5-10分鐘,取出放上花花裝飾即成!吃時可淋上適量豉油,味道更佳!
如要看更多製作過程的相片,請到:
If you like my recipe, please "Like" my page in Facebook! Thanks for your support! ^_^

2013年1月27日 星期日

[素] 粟米蘑菇炒松籽仁

我家小姐最愛吃菇菇,冬菇、草菇、蘑菇樣樣都啱,而她最愛的就是燒烤蘑菇了。因此,我每個星期最少都會煮這味餸1-2次架,皆因簡單易煮、可囗惹味兼營養豐富,用來餸飯真是一流呢,連我那唔鍾意食菇嘅老公,都係咁舀嚟餸飯就知有幾好味喇!!^0^

這個沒有肉的素菜,材料和做法都超級簡單,入廚初哥都一定煮得好好味架!你哋都快啲試下煮啦,你和你的家人都一定會愛上的!^_^


材料:
超甜粟 一條(約150g)
蘑菇 100g (燒烤蘑菇1-2隻/普通蘑菇5-6隻)
松籽仁 50g
蒜蓉 少許
薑片 2-3片

茨汁:
豉油 1/2 湯匙
砂糖 1 茶匙
粟粉 1/4茶匙
清水 1.5 湯匙
麻油及胡椒粉 各少許

做法:
  1. 松子仁用白鑊(不用落油)慢火炒香至金黃色,盛起備用。(若是用即食松子仁,則可省卻此步驟)
  2. 粟米和磨菇切粒備用。
  3. 將鑊燒熱後,落少許油先爆香薑片和蒜蓉,接著落蘑菇粒及灑少許鹽調味,繼續用慢火炒至軟身、有香味及收乾水份後,盛起備用(要把薑片夾起丟掉)。
  4. 燒熱另一隻乾淨的鑊,加少許油用慢火將粟米炒熟(須灑少許清水來煮約1-2分鐘),另灑少許鹽調味,然後加入蘑菇粒炒勻,接著轉中火,落茨汁兜勻及煮滾後,加入松籽仁拌勻後,即可上碟享用了!
備註:

  1. 松子仁於超市(如Taste、International、Fusion、CitySuper等)、烘焙店、某些海味舖或價真棧有售。於上環的海味舖買,價錢最平,一斤(600g)松子仁只須若$150左右。(有些舖頭則賣$110,只得200g咋!)
  2. 松籽仁很易炒燶,因此必須用細火慢慢炒(其間要不停攪動)至金黄色後,立刻盛起備用,以免鑊的餘溫把松籽仁弄燶。
  3. 蘑菇加鹽後會出水,其間並不須要額外加水的,否則用太多水炒的話,蘑菇就唔香架喇!
  4. 雖然將材料分開來煮會香啲靚啲,但若是趕時間開飯,亦可選擇將蘑菇粒先炒一炒便即加入粟米粒同炒,然後落茨汁煮滾後,加入松籽仁拌勻後即成。
營養價值:

松籽 
是松樹的果仁,不但美味可口,而且營養價值十分之高,有"長壽果"嘅美譽;其含油率高達78%,蛋白質14.8%,並含有多種維生素,是很有價值的木本油料和 保健食品,經常食用可預防心臟病;降低血脂,軟化血管。還具有防癌、抗癌之作用,並有滋顏美容之功能。
松子中所含的 不飽和脂肪酸具有增強腦細胞代謝,維護腦細胞功能和神經功能的作用。谷氨酸含量高達16.3%,谷氨酸有很好的健腦作用,可增強記憶力。此外,松子中的磷和錳含量也非常豐富,這對大腦和神經都有很好的補益作用,是腦力勞動者的健腦佳品,對老年癡呆也有很好的預防作用。《節錄自SOSO百科》

蘑菇:
蛋白質含量高:一般認為,肉類和豆類食物中才會含有較高的動物蛋白和植物蛋白,其實蘑菇中的蛋白質含量也非常高,比一般的蔬菜和水果要高出很多。蘑菇富含18種氨基酸,其中人體自身不能合成、必須從食物中攝取的8種必需氨基酸,在蘑菇裡都能找到。有些蘑菇中蛋白質的氨基酸組成比例甚至比牛肉更好。研究發現,蘑菇的營養價值僅次於牛奶

維生素含量高:每100克鮮蘑菇中的維生素C含量高達206.28毫克,比富含維生素C的番石榴、柚子、辣椒等水果、蔬菜還要高2~8倍。維生素C對人體健康起著重要作用,能促進人體新陳代謝,提高機體免疫力。它還具有解毒作用,幫助如鉛、砷、苯等有害物質排出體外,同時也有良好的抗癌功效。很多蘑菇中都含有胡蘿卜素,在人體內可轉變為維生素A,因此蘑菇還有“維生素A寶庫”之稱。一般的新鮮蔬菜和水果都不含維生素D,蘑菇卻是個例外,並且維生素D含量非常豐富,能夠很好地促進鈣的吸收,有利於骨骼健康。

纖維素含量高:蘑菇中的纖維素含量遠遠超過一般蔬菜,可以防止便秘,降低血液中的膽固醇含量,減慢人體對碳水化合物的吸收。
(http://health.people.com.cn/BIG5/14740/21471/7424505.html)



If you like my recipe, please "Like" my page in Facebook! Thanks for your support! ^_^

2013年1月24日 星期四

[素] 脆皮虎皮素鵝

其實這是我這三次整腐皮卷(第一次整素、第二次整鮮蝦腐皮卷),前兩次都因為太急趕(皆因老公同阿女催開飯囉 >.<),所以包得唔好- 太大舊,同埋饀多過皮!

於是,我今晚就等佢哋瞓咗先慢慢硏究,慢慢包再慢慢煎,終於似樣喇!而且重脆卜卜好好味添!你哋話似唔似喺酒樓食嗰啲呢?靚嗎?^0^

材料非常簡單,方法亦不太難,你哋都試下整喇!^_^








材料:(可做兩條)
腐皮 1張
紅蘿蔔 40g
沙葛 60g
冬菇 6隻(細隻的)

做法:
  1. 冬菇洗淨後,先用水浸泡最少四小時,然後搾乾水份及剪去冬菇腳,加入調味(生抽 1茶匙/ 砂糖 1/2茶匙/粟粉 1/4茶匙/ 麻油及胡椒粉 各少許)拌勻,隔水蒸30分鐘(可放飯面蒸)後切成幼絲備用。

  2. 紅蘿蔔和沙葛洗淨後,分別去皮及切成約5厘米長幼絲備用。

  3. 把鑊燒熱後,落少許油先把沙葛用慢火炒熟(軟身及程半透明狀),灑少許鹽和胡椒粉調味,炒勻後盛起備用。

  4. 同樣地用少許油來炒熟紅蘿蔔絲(其間須要灑少許水來煮,約重覆3-4次,直至紅蘿蔔軟身及水份收乾為止),灑少許鹽炒勻後盛起備用。

  5. 最後落冬菇絲炒至略為乾身後,盛起備用。(不須落油炒的;若嫌麻煩,這步驟可以不做!)

  6. 將圓形的腐皮一開二剪成兩張,平放在桌上後用濕布輕輕抹乾淨腐皮兩邊。然後,在腐皮中央靠底的位置先鋪一層紅蘿蔔絲、再鋪冬菇絲、最後鋪上沙葛絲;將腐皮左右對摺,再將開口的一邊向內摺,然後慢慢向上卷成扁扁的腐皮卷備用。(圖l示)

  7. 煮滾一鍋熱水,將腐皮卷平放於碟上(腐皮卷之間最好留少許空間或塗少許油,以防蒸好後黏在一起,將它們分開時便會弄破腐皮),隔水蒸8分鐘,取出備用。

  8. 把鑊燒熱後,落一湯匙油,用慢火把腐皮卷兩邊或四邊煎香後,即可切件上碟享用了,吃時蘸喼汁更添滋味!
(圖1)
備註:
  1. 包腐皮卷並不須要特別封口,只須先煎開囗的一邊,腐皮煎脆定型後便不會鬆開了!

  2. 腐皮可於豆腐舖買得到,約$4-6一張;靚的腐皮是通透、薄身、完好無缺及程金黃色的。若買多了腐皮而用不完的話,可把腐皮每張分開摺疊好,再用牛油紙隔開或包好,放冰箱可儲存一星期;只須下次用之前兩小時,取出放室溫自然解凍即可。

  3. 腐皮本身都算乾淨,只須用扭乾水份的濕布兩邊輕輕抹一抹即可使用,但切忌用水洗及用太濕的布來抹或大力捽,否則便很容易把腐皮弄破,或令腐皮太軟身,很難用來包饀了。

  4. 腐皮卷的饀料有很多選擇,除了紅蘿蔔、冬菇和沙葛外,亦可選用竹荀、銀芽、雲耳和木耳等等,只須3-4樣顏色較分明而你又喜愛的餡料即可!

  5. 包腐皮卷的饀料一定要乾身,否則太多水份會使腐皮變得軟身易穿,便很難包成腐皮卷了!

  6. 為了切開時較美觀,放餡料時宜盡量橫放及逐層放好,那麼切出來便可看到一絲絲顏色分明的餡料了!

  7. 切腐皮卷的技巧:若想切出饀料分明和美觀的腐皮卷,除非你家裡有十分鋒利的刀,否則你最好先用有鋸齒的刀(如生果刀或麵包刀)把腐皮卷「鋸開」上半份,然後再用剪刀剪開下半部份!因為若用冇鋸齒的刀切上半部時,會壓扁腐皮卷;若用有鋸齒的刀切下半部時,鋸齒很易會「拖」出冬菇絲,因此最好用剪刀幫手剪開喇!

  8. 若怕熱氣和肥膩,亦可不用煎的,只須隔水蒸15分鐘,便成蒸的腐皮卷了(好似酒樓的鮮竹卷咁)!但由於味道會偏淡,最好煮少許茨汁淋面或蘸豉油來吃喇。
  9. 好介紹:我就是在灣仔駱克道街市的這間豆腐舖買腐皮($4.5–張)喇,她賣的豆品好靚架,平!靚!正!若你們經過那邊,可幫襯下喇!

如要看更多製作過程的相片,請到:
If you like my recipe, please "Like" my page in Facebook! Thanks for your support! ^_^

2013年1月16日 星期三

清蒸大蝦乾

我通常當這碟是加餸,因為超方便又好味,這是我老公嘅至愛之一!佢重一個人食晒成碟添!>.<



做法:
蝦乾洗淨後放飯面蒸,之後加少少豉油和麻油撈勻即成!

備註:
1)我喺灣仔生昌買天然生曬的大隻蝦乾,要放冰格的,好香架,不過幾貴下!(要$320斤,但包保冇染色,食得開心又放心嘛!)老公鍾意,貴啲都冇計啦!^0^
2)就咁喺冰格拿出來就蒸都唔太硬!老公鍾意𡁻所以無問題,連我個女都咬到;但若想淋啲,亦可先用少少水浸2小時,瀝乾水後才蒸!


-- 發送自我的 iPhone