香濃粒粒芒果雪糕（冇蛋黃及不用雪糕機）

上星期我做了一盒椰香芒果雪糕，雖然巳經讓家人食到舔舔脷，但由於我老公不太喜歡太濃嘅椰汁味，今次就嘗試减少椰汁嘅份量，做了這個芒果味極之濃郁嘅粒粒芒果雪糕喇！

結果，獲得一致好評，當然要立刻和久違了的fans們分享啦！希望大家鍾意啦！^0^

材料: (約 800ml)

芒果肉 450g+130g （約2.5個大芒果）
淡忌廉 250g
椰漿 100g
砂糖 36g（我這次買的芒果好甜！大家請按芒果的甜度自行調較糖的份量！）

做法﹕

1. 將450g芒果肉切粒，放進冰格雪至硬身備用。
2. 用小鍋把100g椰漿、50g淡忌廉和36g砂糖用慢火

煮溶後放涼備用。

用攪拌機（blender) 把芒果冰粒和甜椰漿打至軟滑。

先將200g淡忌廉用電動打蛋器打發至七成企身，然後倒

進芒果糊中，用膠括拌勻後，用保鮮紙蓋好放進冰箱冷藏。

約2小時後取出雪糕糊，用電動打蛋器打鬆，用保鮮紙蓋好

放回冰箱冷藏；約2小時後，再重覆做一次。

將130g已預先切成小粒的芒果肉倒進雪糕糊內，用膠括

或筷子輕手拌勻。(注意：這步驟要做得快及避免過度攪拌，以免雪糕糊溶化，影響雪糕口感）最後，將雪糕糊倒進另一有蓋的容器內，在枱上輕輕「凳」平，蓋好後放進冰箱冷藏至少6小時（或放過夜）至完全硬身，便可用取出享用了。

備註﹕

1. 由於每個芒果的甜度不一，若要更準確調較雪糕的甜度，可以用以上份量煮好甜椰漿，待涼後加入芒果攪勻後先試味；若你覺得太甜，則打忌廉時毋需另加糖粉；若認為甜度剛好，則打忌廉時需加入約6g糖粉同打；若覺得不夠甜，則打忌廉時需要加入約12g或更多的糖粉同打喇！(打發忌廉時，宜於起泡後即落糖粉，以免太遲落糖粉又怕攪唔勻，以致忌廉打發過度而不能使用。)
2. 由於沒有添加劑，自制雪糕會比較硬身，因此宜預早取出置室溫約15-20分鐘，讓雪糕較軟身像才舀出享用，囗感好較佳！
3. 由於沒加防腐劑，自制雪糕宜盡快享用以免變壞，最好於十日內吃完。
4. 若你喜歡椰汁的香味，亦可試試 椰香芒果雪糕 ！

如要看更多製作過程的相片，請到：

http://www.facebook.com/pages/Jennifers-Kitchen/160110140725573#!/media/set/?set=a.342802032456382.75710.160110140725573&type=1

If you like my recipe, please "Like" my page in Facebook! Thanks for your support! ^_^

椰香芒果雪糕

夏天到了，又喺時候整些美味嘅雪糕嚟消暑一下喇！剛巧在街市買了幾個好香嘅芒果，於是就整了今年第一款雪糕- 芒果雪糕喇！我重特登去超市買了些雪糕筒回來與親友一同分享添，個個都話正，食到「lam lam」「利」話唔夠喉呢，重落order話下次要試新口味喎，認真捧場啊！呵呵！^0^

材料：
芒果肉 400g
椰漿 200g
淡忌廉 200g
砂糖 35g （我這次買的芒果好甜！大家請按芒果的甜度自行調較糖的份量！）

做法：

1. 先將芒果去皮切粒備，放進冰箱雪至硬身。


2. 將椰漿和砂糖放進小鍋中，用慢火煮至糖全溶後熄火，放涼備用。（可座冰水以加速冷卻）


3. 用電動打蛋器先將淡忌廉打發至八成企身備用。


4. 用攪拌機把芒果肉和椰漿打至滑身，然後用膠括拌入巳打發的淡忌廉至完全混合。


5. 將雪糕糊放進冰箱冷藏約2小時，然後取出用叉扒鬆或電動打蛋器打鬆後，再放回冰箱冷藏，約2小時後再重覆做１次即可。


6. 將做好的雪糕放進冰箱冷藏至少四小時（或放過夜）至完全硬身後，便可用雪糕勺舀出雪糕球品嘗了！

備註：

1. 由於每個芒果的甜度不一，若要更準確調較雪糕的甜度，可以用以上份量煮好甜椰漿，待涼後加入芒果攪勻後先試味；若你覺得太甜，則打忌廉時毋需另加糖粉；若認為甜度剛好，則打忌廉時需加入約6g糖粉同打；若覺得不夠甜，則打忌廉時需要加入約12g或更多的糖粉同打喇！


2. 打發忌廉時，宜於起泡後即落糖粉，以免太遲落糖粉又怕攪唔勻，以致忌廉打發過度而不能用。


3. 雖然椰汁和芒果的味道很夾，會令雪糕吃起來更香，但若你不太喜歡椰汁，亦可用同等份量的淡忌廉代替；或將椰漿的份量減半，用100g椰漿和100g淡忌廉來煮糖，咁就有淡淡椰香喇！

香濃粒粒芒果雪糕

If you like my recipe, please "Like" my page in Facebook, Thanks! ^_^

魔鬼蛋糕

魔鬼蛋糕是我的至愛，而且在餅店買的已沒有從前般好味（朱古力味現已不太濃了），因此除了班蘭蛋糕外，魔鬼蛋糕便是我做得最多的蛋糕了！今次這個魔鬼蛋糕是用來慶祝 Lianne表妹生日的，我裝飾得靚嗎？希望她鐘意啦！^_^



朱古力戚風蛋糕材料：（8吋模）

蛋黄 4隻
砂糖 30g
低筋麵粉 60g (我用日本 violet cake flour )
鷹粟粉 10g
無糖 Valrhona朱古力粉 20g
油 50g (我用extra light olive oil )
朱古力奶 110g
Valrhona 70%朱古力片 25g (約8片）

蛋白 6隻
砂糖 50g
檸檬汁 1茶匙
鹽 少許

朱古力忌廉材料：
Valrhona 70%朱古力片 80g + 淡忌廉 80g
糖粉（icing sugar) 22g + 淡忌廉（七成發起）250g

朱古力脆脆：
薄脆片 50g
Valrhona 70%朱古力片 約40g

做法：

1. 以電動打蛋器把蛋黃和30g砂糖用高速打至淡黃色（打起後體積會比原來大了2-3倍，需時約2分鐘）
2. 將朱古力奶及50g油加入蛋漿中，用電動打蛋器以中速打勻，然後逐少篩入已過篩兩次的粉類（低粉+粟粉+朱古力粉）, 用膠括以拌入法輕手拌勻備用。
3. 將巳打發好的蛋白分三次以膠括(用拌入法) 輕手拌入朱古力麵糊中，拌勻後慢慢倒進戚風摸中，然後在枱上「登」約二＋下以排出麵糊中的大氣泡。
4. 將巳包好鍚紙的層架先放入已預熱170度的焗爐中（放最頂層以隔著上面的發熱線)，然後才放進盛有麵糊的戚風模，以170度焗30分鐘後轉160度再多焗30分鐘(到最後10分鐘時要取出頂層的層架)即成。在焗爐取出戚風蛋糕後，要立刻倒轉放涼，待完全放涼後(約需兩小時左右)才可脫模備用。 
5. 將朱古力蛋糕平均切成兩份備用。
6. 將80g淡忌廉用小鍋煮至邊邊微滾，然後倒進 80g朱古力片中，靜置10-15分鐘後才慢慢拌勻成朱古力漿。
7. 將250g淡忌廉加22g糖粉打發至七成發泡後，將朱古力漿輕輕拌勻成朱古力忌廉，然後座於冰水中備用。
8. 先在蛋糕轉盤上放一片朱古力蛋糕，塗上一層朱古力忌廉後蓋上另一片朱古力蛋糕，然後將朱古力忌廉均勻抹上整個蛋糕，再加上適量裝飾後即成！
9. 將40g已座溶的朱古力和 50g薄脆片拌勻後，平勻鋪在牛油紙上，放雪櫃冷藏至硬身後再「搣」成小塊，即成美味的朱古力脆脆了！ 

如要看更多製作過程的相片，請到：

http://www.facebook.com/media/set/?set=a.302933083109944.68674.160110140725573&type=1

If you like my recipe, please "Like" my page in Facebook! Thanks for your support! ^_^

給Lianne表妹的生日蛋糕

好耐無整過 cream cake 啦，適逢Lianne表妹生日，就一於整下大家都喜愛嘅魔鬼蛋糕啦！由於時間緊迫，唔夠時間裝飾蛋糕，只是將剛買回來洗淨的士多啤梨放上蛋糕面，再即埸寫埋朱古力生日牌（緊張到手震震呢＞.＜）！不過我覺得都幾靚吖，最緊要喺好好味呢，一於遲些再整過！^_^

超鬆化椰香雞蛋卷

雖然最近超級繁忙，但阿女話老師要他們今天帶一些用蛋做​嘅食物回校和同學分享喎，所以昨晚我就漏夜做了這個「人​見人愛」嘅雞蛋卷喇！我今次還加了椰汁來做，真係又香又​脆呢！希望啲同學仔鍾意啦！^0^

靚唔靚呢？似市面賣的雞蛋卷嗎？^_^

Close-up!! 似樣嗎？^0^

材料：

無鹽牛油 120g

砂糖 80g

低筋麵粉 90g

全蛋 2隻 (每隻約重60g)

蛋黃 1隻

椰漿 30g

鮮奶 20g

鹽 少許

做法：

1. 牛油預先於室溫放軟，加砂糖用電動打蛋器打勻；然後分別再逐小加入雞蛋、椰漿及鮮奶打勻備用。
2. 逐少篩入低筋麵粉，用電動打蛋器打勻，然後將整盤蛋漿座於冰水中備用。
3. 先將蛋卷夾兩邊都燒熱，調至最細火，打開蛋卷夾，放一小匙蛋漿於蛋卷夾中央，把蛋卷合緊，每邊各燒約1-2分鐘（因爐溫不同，請自行調節時間）。
4. 打開蛋卷夾（蛋卷應呈微微金黃色），用小刀或鏟輕輕挑起一端放於金屬條上，然後用（已戴上勞工手套的）手掌貼著金屬條把蛋卷卷起，放於架上放涼，然後再重覆以上步驟，把蛋卷再卷多一層，待放涼後拿出金屬條即成。

備註：

如要看更多製作過程的相片，請到：
http://www.facebook.com/media/set/?set=a.290376907698895.66053.160110140725573&type=1

If you like my recipe, please "Like" my page in Facebook! Thanks for your support! ^_^

美味蘿蔔糕

我的屋企人早喺個幾兩個月前已落咗order要食蘿蔔糕了，但我要等整好臘肉後先開工整蘿蔔糕嘛，所以遲咗開工整囉！

其實我今年已整了三次蘿蔔糕架（今晚又整咗回四底^0^）喇，不過最近真係超級忙，連開電腦嘅時間都冇，所以宜家先出post囉!

預祝大家龍年快樂，身體健康！^_^

材料：

白蘿蔔 5斤半（約3300g)

粘米粉 500g

臘腸 4-5條

臘肉 半條 （約100g)

冬菇 4-5隻 

乾瑤柱 5粒

蝦米 30g

薑 3-4片

調味： 雞粉3.5茶匙 / 鹽 1.5茶匙／ 冰糖 12g（若用沙糖 約2茶匙）／胡椒粉 1／2茶匙

做法：

1. 白蘿蔔洗淨去皮後刨粗絲，隔去水份備用。
2. 乾瑤柱洗淨後用少許清水（僅夠浸過瑤柱）浸軟，除去較硬的蒂備用。
3. 冬菇洗淨用少許清水（僅足夠蓋過冬菇）浸軟，剪去冬菇「掟」後瀝乾，加入調味（豉油 1茶匙／ 糖 1／2茶匙 ／胡椒粉及麻油 各少許）拌勻，將乾瑤柱放在冬菇面，隔水蒸20分鐘後，分別切粒及拆成絲備用。
4. 臘肉洗淨後隔水蒸5-10分鐘（視乎大小）至略為軟身，切粒備用。
5. 先把蝦米洗淨，用少許清水浸軟，瀝乾後略為切碎。將鑊燒熱後，落半湯匙油把蝦米爆香，盛起備用。
6. 將鑊燒熱後（不用落油），落臘腸及臘肉用慢火爆香，盛起備用。(若怕肥膩，可把多餘的油倒去)
7. 將臘腸及臘肉回鑊，加入冬菇粒及瑤柱絲用慢火略為炒香，轉大火後攢酒（2湯匙玫瑰露／米酒／紹酒）快手炒勻，熄火盛起備用。
8. 將鑊燒熱後，落1湯匙油把薑片爆香，先落一半蘿蔔絲炒勻，再落餘下的蘿蔔絲、蘿蔔水及調味。
9. 落調味後拌勻加蓋，煮約10-15分鐘（水滾後轉慢火，否則會失去太多水份）至冰糖全溶及蘿蔔轉為半透明狀便可熄火。
10. 將3／4材料（1／4材料留起用來放面作裝飾）加入蘿蔔絲中拌勻。
11. 遂少篩入粘米粉然後用木筷子攪拌，直至將所有粘米粉拌勻至沒有粉粒為止，最後加入浸蝦米及乾瑤柱的水備用。
12. 先在糕盤掃一層油，倒入適量蘿蔔粉漿，輕輕掃平後平均灑上少許臘腸臘肉等材料以作裝飾，放入蒸籠中以大火蒸1小時即成。
13. 蒸好的蘿蔔糕，要放在架上待完全放涼後（約需4-6小時，視乎糕的大小及厚薄），才可放進雪櫃冷藏。

備註：

1. 小貼士：白蘿蔔要揀大隻肥身、表皮白淨光滑無缺及重身（代表水份充足）為佳！
2. 蒸好的蘿蔔糕一定要完全放涼後才可放進雪櫃冷藏，否則蘿蔔糕會變壞，那便浪費心機了！
3. 若想將蘿蔔糕切件煎來品嘗，最好先將蘿蔔糕冷藏至硬身後才切件，會比較容易切得整齊而不會散。

如要看更多製作過程的相片，請到：

http://www.facebook.com/media/set/?set=a.256563704413549.59917.160110140725573&type=1

If you like my recipe, please "Like" my page in Facebook! Thanks for your support! ^_^

自製蜜汁豬肉乾

我老公和阿女都好鍾意食豬肉乾架，但宜家出面賣好貴呀！上個月去味X香買咗二百幾蚊，好似都冇十塊，重話係特價喎，要成$145半斤呀（唔知有冇記錯），總之就貴到飛起啦！重要冇以前咁好食，超甜啊！＞.＜

早前在babykingdom見到有媽媽整（多謝hohomay嘅分享)，才知道原來豬肉乾只是將豬肉剁碎加調味再轆平放入焗爐焗，便成為美味的豬肉乾了！我當然要立刻試整啦！原來豬肉乾真係好易整架咋，我用新鮮豬肉加簡單調味（比較少甜少鹽），做出來的豬肉乾真係好味過出面買呢！最緊要是肯定冇落味精冇落防腐劑，又可以減少肥豬肉減少落糖同鹽，吃得放心之餘重平過出面買好多添！真係好正架！你都快啲試整啦！^0^

材料：（這份量可做兩大塊）

豬肉 半斤（約300g）

調味：

砂糖 4湯匙（怕甜可以再減一至二湯匙）
蜜糖 1湯匙
豉油 1.5湯匙
玫瑰露 1湯匙（可以唔落，但味道會唔同）
鹽 1/3茶匙
黑胡椒和白胡椒粉 各少許（只是增加香味，小朋友都食唔出架！）

蜜糖 1湯匙加暖水 1茶匙（用來掃面用的）

做法：

1. 豬肉洗淨後剁碎，加調味攪至起膠，用保鮮紙蓋好，放入雪櫃冷藏（最少）半小時備用。


2. 預熱焗爐於150度。


3. 將1湯匙蜜糖和1茶匙暖水拌勻備用。


4. 在枱上墊一張牛油紙後放上一半豬肉，然後用麵粉棒隔著保鮮紙把麵團擀平至約2mm厚度。


5. 將已擀平的豬肉放在焗盤上，先掀起保鮮紙後放入焗爐（放中層）內每邊各焗15分鐘。


6. 取出豬肉乾，掃上蜜糖後，再放入焗爐（放上層）內以160度每邊再焗8分鐘即成。


7. 從焗爐取出已焗好的豬肉乾，放在架上略為放涼後，即可用剪刀剪成小塊，趁熱享用了。

備註：

1. 用來做豬肉乾的豬肉不能太瘦，否則會較韌和唔香！買豬肉時，可以話買來蒸肉餅的，要有少少肥豬肉便可！


2. 已剁碎的豬肉，仍會有少許筋（細細舊，剁不爛的），最好揀出來丟掉，否則做起的豬肉乾便會有筋了！


3. 豬肉剁碎及加入調味後，一定要攪至起膠黏成一團，否則焗起後會散開而不是一塊了！


4. 其實每個焗爐的溫度都不同，大約需要150-160度！但亦要視乎你所擀平的「豬肉乾」的厚度而定！ 我建議應先試用150度來焗，若15分鐘後（第一邊）焗出來的豬肉乾出太多肉汁流出（正常是有少少汁），這便表示爐溫不夠高，焗第二邊時便可改用160度來焗了；相反，若焗出來的豬肉乾看起來較乾及邊緣有少許「火農」，這便表示爐溫過高，應用較低的溫度了！ 若焗好兩邊的豬肉乾已有少許「火農」及偏乾身，掃完蜜糖後，宜用150度放中層焗5分鐘，然後反轉再掃蜜糖及再多焗5分鐘。 相反，若焗好兩邊的豬肉乾仍很濕，便可用160度放上層焗8分鐘，然後反轉再掃蜜糖及再多焗8分鐘。若仍是不夠乾身，可重覆再掃蜜糖及再多焗5分鐘，直至滿意為止！

如要看更多製作過程的相片，請到：
http://www.facebook.com/media/set/?set=a.250086361727950.58540.160110140725573&type=1

 

If you like my recipe, please "Like" my page in Facebook! Thanks for your support! ^_^