香滑特濃朱古力雪糕（不須雪糕機或攪拌機、不用加蛋黃）

前幾日試過將啲朱古力奶雪成冰，再同已加朱古力的cream一起打，但製成品好icy，唔好食失敗咗！！＞.＜

昨晚，雖然好夜回家（因為要同屋企人出街食飯），但都係忍唔住要再試整多一次！！我成11pm先開工，又攪到三更半夜！

今天早上，早餐都未食就急不及待拿杯雪糕出嚟試味和影相！
好彩今次終於成功喇（其實今次都係等二次整啫^_^）！今次好creamy同有好濃嘅朱古力味！Yeah! Yummy! Yummy!
不枉我瞓得咁少！呵呵！^_^

其實真係好易整嫁，今次同樣唔駛用雪糕機，就連攪拌機都唔駛用添！不須要加蛋黃，啱晒同小朋友一齊整！有得玩又有得食！正呀！

大部份小朋友都偏愛吃朱古力味嘅食物，但街外的大都是超甜！我真係唔想俾阿女食！！宜家自己做雪糕，就可以落少啲糖，咁小朋友都可以食得開心又健康啦！

你都一於試下整啦！超易！！

＜以上都是我的感受，請不要笑我hard sell 喎！我真係想大家有得玩又有得食，重要食得健康啲嫁! ^_^＞

  

材料：
淡忌廉 140g
朱古力奶 60g （可以用鮮奶代替）
62% 朱古力 50g (切成小塊備用）
無糖朱古力粉 6g
栗粉 1／2茶匙（可以落少一點，便會再軟滑一點）
砂糖 6g （這是少甜版，請隨個人口味增加份量）

做法：

1. 用10g朱古力奶和栗粉拌勻至沒有粉粒備用。
2. 將餘下的朱古力奶和淡忌廉放入鍋中，用中慢火煮熱至開始冒堙便可熄火。
3. 加入朱古力小塊和砂糖，用木勺不停攪拌至完全溶化。
4. 遂少篩入朱古力粉，用木勺不停攪拌至完全混合。
5. 開細火加熱至微微冒堙，將已攪勻的（1）慢慢拌入雪糕漿內，用木勺不停攪拌至較為杰身，便可熄火。
6. 將雪糕漿倒進較濶身的器皿內，待完全放涼後便可放進冰箱冷藏。
7. 約45分鐘後，取出混合物用鐵叉扒鬆，再放回冰箱冷藏。約45分鐘後再重複做一次，然後輕輕壓平，放回冰箱雪過夜便可享用了。

備註：

1. 如跟以上分量做的雪糕會是少甜和朱古力味十分濃的 dark chocolate ice-cream！如想做給小朋友食或想做牛奶朱古力雪糕，可以直接用較甜的牛奶朱古力片代替62%朱古力片，而無糖朱古力粉的分量亦可減半至3g，至於糖的份量就可隨個人口味而加減！
2. 把做好的雪糕漿放涼時 ，最好可以隔一會便攪一攪，以避免表面結了一層深色的薄膜，影響賣相！ 
3. 如想縮短放涼的時間，可以把雪糕漿座於冰水裡，那麼不消15分鐘便可放進冰箱冷藏了。

4. 盡量用較濶身的器皿來放雪糕漿，因為這樣的雪糕漿會較薄，這樣便可縮短冷藏的時間，可以快些拿出來扒鬆和快些做好了！此外，這樣亦可有多些空間用來扒鬆和攪動，避免雪糕彈出器皿外，浪費心機了。 
5. 如想做碎朱古力或果仁雪糕，可在雪糕漿原全放涼後，加入輕手拌勻才放進冰箱冷藏。
6. 其實做這個雪糕，並不需要特別到烘焙店買朱古力粒或無糖朱古力粉來做的，可隨意用你喜愛的朱古力條和沖朱古力奶用的朱古力粉來做便可，只要做雪糕漿時不斷試味，便可做出獨一無二啱晒你囗味的朱古力雪糕了！^_^

如想睇多些製作過程的圖片，請到﹕

http://www.facebook.com/photo.php?fbid=164525600284027&set=a.164511930285394.41190.160110140725573&type=1&theater#!/media/set/?set=a.164511930285394.41190.160110140725573

-- 發送自我的 iPhone